लोक सेवा आयोगको असंवैधानिक विज्ञापन विरुद्ध पोखरामा प्रदर्शन

पोखरा- लोक सेवा आयोगको असंवैधानिक विज्ञापन विरुद्ध आदिवासी जनजाति लगायत, दलित शिल्पी, मधेशी, मुस्लिम आन्दोलित भईरहेको बेला पोखरामा पनि विरोध प्रदर्शन गरिएको छ ।

नेपाल आदिवासी जनजाति महासंघ कास्कीको आयोजनामा पोखरा ११ रानीपौवा दुरसञ्चारचोकबाट शुरु भएको विरोध ¥याली महेन्द्रपुल, चिप्लेढुंगा विपी चोक हुदै मानवअधिकार चोकमा पुगी कोणसभामा परिणत भएको थियो ।

आयोजित कोणसभामा आदिवासी जनजाति महासंघका केन्द्रीय उपाध्यक्ष गणेश थकालीले जस्तो सुकै मुल्य चुकाएर भए पनि समावेशीताको अधिकार खोस्न नदिने चेतावनी दिए ।

तमुवान संघर्ष समिति तथा तमु धिं नेपालका उपाध्यक्ष हुमबहादुर तमुले प्राप्त अधिकार लुट्न खोज्ने लुटेराहरुलाई कारवाही गर्न उत्पिडित जनताकाहरु सशक्त आन्दोलनमा उत्रनुपर्ने बताए ।

तमुवान भोलिन्टिर्सका कृष्णकुमार तमुले समावेशी अधिकार खोसिए विगतमा जस्तै भयंकरको आन्दोलन हुने चेतावनी दिए ।

शिल्पी दलित महासंघ केन्द्रीय सदस्य किसन विश्वकर्माले अधिकार लुट्ने पहिचान विरोधीहरुलाई सत्तामा पु¥याएकाले विगतदेखि विभेदमा पारिएका जनताले पाएका अधिकार पनि खोसिदै लगिएको उल्लेख गरे ।

आदिवासी जनजाति विद्यार्थी महासंघ कास्कीका अध्यक्ष सुजन तामाङले असंवैधानिक विज्ञापन खारेजीसँग आरक्षण अधिकार सुनिश्चित हुनुपर्ने बताउनुहुदै गण्डकी प्रदेशका कुनै पनि हालतमा समावेशी माथि प्रहार गर्न नदिने चेतावनी समेत दिएका थिए ।