एकै रात २ गाउँपालिका अध्यक्षका गाडीमा आगजनी

दाङ- दाङ र कपिलवस्तुमा गाउँपालिका अध्यक्षका गाडीमा आगजनी भएको छ। शनिबार एकै रात यी दुबै आगजनी भएका हुन्। 

अज्ञात समुहले दाङको बंगलाचुली गाउँपालिकाका अध्यक्षले प्रयोग गर्दै आएको गाडीमा गएराती आगजनी गरिदिएका छन् ।

अध्यक्ष भक्तबहादुर वली चढ्दै आएको रा १ झ १५२ नम्बरको गाडीमा गएराति करिब १२ः४५ को समयमा आगजनी भएको हुन सक्ने जिल्ला प्रहरी प्रमुख एसपी बेलबहादुर पाण्डेले जानकारी दिए ।

गाउपालिका वडा नं.५ को कार्यालय प्राङ्गण मुर्कुटीमा पार्किङ गरि राखिएको गाडीमा आगजनी भएको हो । आगजनीबाट गाडी पूर्ण रुपमा जलेर नष्ट भएको छ । गाडिमा लागेको आगो ईलाका प्रहरी कार्यालय कमिरेचौरबाट सई गोपालप्रसाद शर्माको कमान्डमा खटीएको प्रहरी टोली र स्थानीयले नियन्त्रणमा लिएको थियो ।

आगजनी कसले लगाएको भन्ने आधिकारिक पुष्टि भने हुन सकेको छैन । तर प्रहरीले प्रतिबन्धित नेत्रविक्रम चन्द विप्लव नेतृत्वको नेकपाका नेता कार्यकर्ताले आगजनी गरेको हुन सक्ने अनुमान लगाएको छ ।

‘हाम्रो आशंका विप्लव तर्फ नै हो । तर, घटनास्थल नपुग्दा सम्म र अनुसन्धान पछि मात्रै त्यो कुरा भन्न मिल्छ,’ एसपी पाण्डेले भने । पाण्डेले आफु अहिले घटनास्थल तर्फ जादै गरेको पनि बताए ।

उता कपिलवस्तुको मायादेवी गाउँपालिकाका अध्यक्ष बजरंगी चौधरी चढ्ने गरेको लु १ झ ४०० नम्बरको सरकारी गाडीमा आगजनी भएको छ ।

कपिलवस्तु को सदरमुकाम तौलिहवामा रहेको भाडाको निवास अगाडि पार्किङमा राखिएको गाडीमा राति १०ः३० बजेतिर आगजनी भएको हो ।

नचिनेका मान्छेको समूहले शनिबार राति आगजनी गरेको हुन सक्ने बताइएको छ ।

आगजनी किन र कसले गर्‍यो भन्ने थाहा नभएको अध्यक्ष चौधरीले बताए । आगजनीका कारण गाडी जलेर पूर्ण रुपमा क्षति भएको छ ।

कपिलवस्तु नगरपालिकाको दमकलले आगो निभाएको थियो । घटनाबारे अनुसन्धान भइरहेको जिल्ला प्रहरी कार्यालय कपिलवस्तुले जनाएको छ ।