समाजवादीमा पार्टी प्रवक्तामा तिवारीको चर्चा

काठमाडौं- समाजवादी पार्टी नेपालले प्रवक्ताको जिम्मेवारी नेता नारायण तिवारीलाई दिने तयारी गरेको चर्चा सुरु भएको छ।

पार्टी एकीकरण भएको तीन महिना बितिसक्दा पनि प्रवक्ता नहुँदा पार्टीको आधिकारिक धारणा सहज वितरण नभएपछि प्रवक्ताको खोजी सुरु भएको हो।

प्रवक्ताका लागि धेरै नेताहरुले इच्छा देखाएपनि तिवारीको नाम चर्चामा छ।

तिवारीसँग दुई दशक लामो पत्रकारिताको अनुभव समेत भएकाले उनलाई प्रवक्ताको जिम्मेवारी दिने तयारी गरिएको समाजवादी पार्टीका एक नेताले बताए।

पार्टीमा प्रवक्ताको खोजी भइरहेको र पूर्व नयाँ शक्तिका लागि दिने विषयमा तयारी भइरहेको नाम उल्लेख नगर्ने शर्तमा उनले भने।

अध्यक्ष बाबुराम भट्टराईले तिवारीको नाम प्रस्ताव गर्ने र अर्का अध्यक्ष उपेन्द्र यादव सहमत भएमा तिवारी प्रवक्ता बन्ने ती नेता‍ले बताए।

नयाँ शक्ति पार्टी हुँदा केन्द्रीय सदस्य तिवारी संघीय समाजवादी पार्टीसँगको एकतापछि विज्ञ समितिका सदस्य हुन्।