मन्त्रिपरिषद् हेरफेर हुँदैनः प्रधानमन्त्रीको सचिवालय

काठमाडौं । प्रधानमन्त्रीका मुख्य सल्लाहकार विष्णु रिमालले मन्त्रिपरिषद् हेरफेर ‘हल्ला’ मात्रै भएको बताएका छन् ।

सल्लाहकार रिमालले प्रधानमन्त्री केपी शर्मा ओलीले क्याबिनेट सदस्य हेरफेरको कुनै तयारी नगरेको प्रष्ट पारेका हुन् । “मन्त्रिपरिषद् अहिले नै हेरफेर हुँदैन । सरकारको त्यस किसिमको कुनै तयारी छैन,” उनले भने ।

दुई दिनअघिमात्रै सत्तारूढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले मन्त्री हेरफेर गर्ने सन्दर्भमा प्रधानमन्त्री एवम् पार्टी अध्यक्ष केपी ओलीसँग कुराकानी भइरहेको बताएका थिए । यद्यपि प्रधानमन्त्री ओलीले मन्त्री फेरिहाल्न हतार नभएको जवाफ दिएको उनको भनाइ थियो ।

“मन्त्री फेर्ने विषय प्रधानमन्त्रीमै बढी भर पर्छ । उहाँले कसरी सोच्नुभएको छ, मलाई थाहा छैन,” मंगलबार विराटनगरमा सञ्चारकर्मीसँगको कुराकानीमा उनले भनेका थिए, “आजैमात्र पनि प्रधानमन्त्रीसँग मन्त्री हेरफेर गर्नेबारेमा कुराकानी भएको थियो । प्रधानमन्त्रीजीले भन्नुभएको थियो– मन्त्री फेर्नैपर्ने भए दुई अध्यक्षबीच छलफल गरेर गर्न पनि सकिन्छ । अहिले हतारो छैन ।”

प्रधानमन्त्रीको सचिवालयले पनि चैतको दोस्रो साता हुन लागेको लगानी सम्मेलनपूर्व मन्त्रिपरिषद् हेरफेरको कुनै सम्भावना नरहेको प्रष्ट्याएको हो । बारम्बार मन्त्रिपरिषद् हेरफेरको तयारी भइरहेको सन्देश जाँदा मन्त्री र कर्मचारी दुवैमा ‘अस्थायी’को मानसिकताले काम गरिरहेको टिप्पणी पनि हुन थालेको छ ।