अपाङ्ग महिला बलात्कार गर्नेलाई आठ वर्ष कैदको फैसला

पाँचथर-अपाङ्गता भएकी २० वर्षीया महिलालाई बलात्कार गरेको कसुरमा पाँचथर फाल्गुनन्द गाउँपालिका–१ का २६ वर्षीय लाले भन्ने सुरेश भुजेलविरूद्ध जिल्ला अदालत पाँचथरले ८ वर्ष कैदको फैसला गरेको छ ।

जिल्ला न्यायाधीश मनोज केसीको इजलासले विहीवार गरेको फैसलामा कसुरदारबाट पीडितलाई ३० हजार रुपैयाँ समेत क्षतिपूर्ति भराउन भनिएको छ । केसी इजलासको फैसला अनुसार कसुरदारलाई कैद भुक्तान गर्न जिल्ला कारागार चलान गरिएको सो अदालतका सूचना अधिकारी याम चौहानले बताए ।

अदालतको आदेशले आरोपित ०७५ पुस २२ गतेदेखि पूर्पक्षका लागि कारागारमा रहेका थिए ।

पीडितलाई मङ्सिर २७ गते बलात्कार गरेको भन्दै पुस १ गते पीडिका आफन्तले जिल्ला प्रहरी कार्यालयमा उजुरी दर्ता गराएका थिए ।

पीडित महिलाको स्वास्थ्य परीक्षण सोही दिन जिल्ला अस्पताल पाँचथरमा स्वास्थ्य परिक्षण भयो । आरोपितलाई प्रहरीले पुस १ गते नै गिरफ्तार गरेको थियो ।