कोरिया भाषा परीक्षाको फारम भोलिदेखि अनलाइनबाट भर्न सकिने

काठमाडौं- रोजगार अनुमति प्रणाली (इपीएस) परीक्षाको भोलिदेखि भर्न पाइने भएको छ ।
वैदेशिक रोजगार विभागको ईपीएस शाखाले अनलाइन फारम भर्ने प्रणाली सुरु गरेको हो । जसअनुसार परीक्षार्थीले आफैं फारम भर्न सक्ने छन् । विगतका समयमा फारम भर्नका लागि परीक्षार्थीलाई रातभर लाइनमा बस्नुपर्ने बाध्यता थियो । अब भने फारम घर वा कार्यालय जुनसुकै ठाउँबाट पनि भर्न सकिने भएको हो |

आवेदन खुलेपछि अनलाइन फारम भर्न www.eoers.epsnepal.gov.np लग–इन गर्नुपर्छ । यो साइटमा गएर मागिएका कुरा भरेपछि परीक्षार्थीको इमेलमा प्रवेशपत्र आउँछ । यो प्रवेश पत्रलाई रङ्गीन प्रिन्ट गर्नुपर्छ र परीक्षा दिन जाँदा सक्कली एमआरपीसँगै लिएर जानुपर्छ ।

अनलाइन फारम भर्नका लागि ईपीएस शाखाले तोकेको ग्लोबल आईएमई बैङ्कको शाखामा आवेदन शुल्क बुझाउनु पर्छ । बैङ्कले पैसा जम्मा गरेको कोड दिन्छ । यो कोड अनलाइन फारम भर्दा आवश्यक पर्छ । अर्को कुरा तपाईंसँग एमआरपी (मेसिन रिडेबल पासपोर्ट) हुनु अनिवार्य छ ।

फारम भर्दा एकजना व्यक्तिले एउटै मात्र क्षेत्रमा आवेदन दिनुपर्छ । पछि रोजगारका लागि फारम भर्दा पनि परीक्षा फारममा भरेको क्षेत्रमा भर्नुपर्ने हुन्छ । जस्तै ः तपाईंले उत्पादनका क्षेत्रमा फारम भर्नुभएको छ भने रोजगारका लागि आवेदन फारम भर्दा उत्पादन क्षेत्रलाई नै उल्लेख गर्नुपर्छ ।

उत्पादनमूलक क्षेत्रमा फारम भरेकाले तीनवटा उपक्षेत्र छान्न पाउनेछन् । कृषिमा फारम भरेकाले भने दुईवटा उपक्षेत्र छान्नुपर्छ ।

सन् २०१८ मा उत्पादनको क्षेत्र र कृषिमा गरी १० हजार २ सय नेपाली कामदार कोरिया जाँदैछन् । जसमा उत्पादनमूलक क्षेत्रमा ४ हजार र कृषिको क्षेत्रमा ६ हजार नेपाली कामदार कोरिया जाँदैछन् ।

ईपीएस परीक्षा आगामी २०७४ जेठ २७ र २८ गते हुँदैछ । परीक्षा केन्द्र र समय भने जेठ १९ गते सार्वजनिक गरिने ईपीएस कोरिया शाखाले जनाएको छ |