बञ्चरेडाँडामा सुरक्षाकर्मी परिचालन, फोहोर फाल्न अवरोध गर्ने एक पक्राउ

काठमाडौँ- नुवाकोटका एसपी रमेश पण्डितका अनुसार बञ्चरेडाँडामा फोहोर फाल्न अवरोध गर्ने एक जना पक्राउ परेका छन् ।

यस्तै, स्थानीयले फोहोर विसर्जनमा अवरोध गरेपछि नेपाल प्रहरीका दुईजना एसपीको कमाण्डमा दुई सयभन्दा धेरै प्रहरी परिचालन गरिएको पण्डितले जानकारी दिएका छन् ।

फोहोर बिसर्जन स्थलमा सशस्त्र प्रहरी पनि परिचालन गरिएको छ । सशस्त्र प्रहरी बलका डिएसपी दामोदर ढोडारीको नेतृत्वमा बञ्चरे डाँडामा डेढ सय भन्दा बढी सशस्त्र प्रहरी खटिएका छन् । मंगलबार फोहोर बिसर्जनमा स्थानीयले अवरोध गरेपछि प्रहरी ५ राउण्ड हवाई फायर गरेको थियो ।

एसपी पण्डितका अनुसार अहिले सहज रुपमा फोहोर विसर्जनको काम भइरहेको छ ।