भारत भ्रमण सफल, सीमा विवाद बारे छलफल भयो : प्रचण्ड

काठमाडौँ- भारत भ्रमण अपेक्षाअनुसार सफल भएको नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले बताएका छन् । फर्किएपछि त्रिभुवन अन्तरराष्ट्रिय विमानस्थलमा सञ्चारकर्मीसँग प्रचण्डले सो कुरा बताएका हुन् । उनि तीनदिने सद्‌भावना भ्रमण गरेर स्वदेश फर्केका हुन् ।

भारतका सरकारी पदाधिकारी र भारतीय जनता पार्टीका विभिन्न पदाधिकारीसँग भेट भएको उनले जानकारी दिएका छन् । प्रचण्डले भारतीय विदेशमन्त्री एस जयशंकर, भारतीय विदेश सचिव विनयमोहन क्वात्रा, भाजपा अध्यक्ष जेपी नड्डालगायत पदाधिकारीसँग भेट गरेको बताएका छन् ।

उनले भने‚ “सरकारी र पार्टीका पदाधिकारीसँग भेट भयो । अपेक्षानुसार भ्रमण सफल भएको छ। कतिपय सन्दर्भमा सोचेभन्दा राम्रो भ्रमण भएको छ । न्यानो स्वागत भयो । पहिला प्रधानमन्त्री भएर जाँदाभन्दा अहिले फरक लागेन‚ त्यस्तै सुरक्षा दिए । विनयमोहन क्वात्रासँग फलदायी छलफल भयो ।”

उनले थप भने, “भेटमा नेपाल-भारतका वर्तमान समस्या, सीमा विवाद, डुबानका बारेमा पनि छलफल भएको छ । अहिलेको प्रमुख समस्या पेट्रोलको रहेकोले भारतमा रुसबाट आउने कच्चा तेल नेपाललाई सहुलियतमा दिनेबारे पनि चर्चा भयो । भ्रमणपछि अब नेपाललाई विभिन्नखाले सहयोग र अहिलेका समस्या समाधान हुने कुरामा विश्वस्त छु ।”