मलामी बोकेको गाडी दुर्घटना, ११ जना घाइते

धादिङ- धादिङको निलकण्ठ नगरपालिका-८ मा मलामी बोकेर ज्वालामुखी गाउँपालिका-३ मैदी जाँदै गरेको गाडी दुर्घटना हुँदा ११ जना घाइते भएका छन् ।

जिल्ला प्रहरी कार्यालय धादिङका अनुसार गएराति करीब १० बजे मलामी बोकेर मैदी जाँदै गरेको बा४ख १२२९ नम्बरको स्वराज गाडी मैदीभञ्ज्याङमा अनियन्त्रित भएर दुर्घटना भएको हो ।

घाइते भएका ११ जनामध्ये ज्वालामुखी २ का ४६ वर्षीय शिवकुमार श्रेष्ठ, ज्वालामुखी ३ का १५ वर्षीय अशोक श्रेष्ठ, सोही ठाउँका ४० वर्षीय पदम बहादुर मगर, २५ वर्षीय नारायण श्रेष्ठ र धन बहादुर मगरलाई उपचारका लागि ट्रमा सेन्टर काठमाडौँ पठाइएको प्रहरीले जनाएको छ ।

घाइतेमध्ये ६ जना जिल्ला अस्पताल धादिङमा सामान्य उपचारपश्चात् डिस्चार्ज भएका छन् । प्रहरीका अनुसार चालकलाई नियन्त्रणमा लिएर घटनाबारे अनुसन्धान भैरहेको छ।