ओलीलाई गृह नगर दमकमै संकट

दमक-दमक नगरपालिकाको मेयरका लागि सत्तारुढ गठबन्धनले राष्ट्रिय प्रजातन्त्र पार्टीका राम थापालाई उम्मेदवार बनाउने निर्णय गरेपछि नेकपा एमाले अध्यक्ष केपी शर्मा ओलीलाई जित्न नैतिक संकट परेको छ।

अध्यक्ष ओलीको गृहनगर र निर्वाचन क्षेत्र पनि भएकाले उनलाई दमकमा मेयर जित्न प्रतिष्ठाको विषय बनेको छ।

सत्ता गठबन्धनले राप्रपालाई मेयरको टिकट दिएर माओवादी केन्द्रका गगन पुरीलाई उपमेयरमा उठाउने निर्णय लिएको छ।

कांग्रेसले मेयरको दाबीबाट आफ्नो अडान छाडेपछि दमकमा तीन दलबीच गठबन्धन पक्का भएको हो। यहाँ अब कांग्रेस, माओवादी केन्द्र र राप्रपा मिलेर चुनाव लड्ने भएका छन्।

कांग्रेस र माओवादीको समेत साथ पाएका थापा राप्रपा प्रदेश १ अध्यक्ष पनि हुन्।

तीन दलको सहमति अनुसार यहाँ राप्रपालाई मेयरसहित २ वटा वडा, माओवादीलाई उपमेयरसहित २ वटा वडा र कांग्रेसलाई ६ वटा दिइएको छ।

२०७४ को स्थानीय तह निर्वाचनमा प्राप्त मतलाई आधार मान्ने हो भने दमक नगरपालिकामा गठबन्धन दलको बिजय निश्चित देखिएको छ।