प्रधानन्यायाधीशले राजीनामा नदिए देशभर आन्दोलन

काठमाडौं-नेपाल बार एसोसियनका सल्लाहकारहरूले प्रधानन्यायाधीश चोलेन्द्रशमशेर राणाले राजीनामा नदिए आन्दोलन चर्काउन सुझाव दिएका छन् ।

प्रधानन्यायाधीशको विषयमा न्यायालय विवादित बनेको भन्दै वकिलहरूलाई आन्दोलन गर्न सल्लाहकार परिषद्का सदस्यहरूले सुझाव दिएका हुन् । यो समाचार आजको राजधानी दैनिकले छापेको छ।

समाचार अनुसार बैठकमा सबै सल्लाहकारहरूले राजीनामा माग्न र नदिए आन्दोलन चर्काउन सुझाव दिएको सल्लाहकार तथा पूर्वमहान्यायाधिवक्ता रमणकुमार श्रेष्ठले बताए ।

प्रधानन्यायाधीशको विषयमा प्रश्न उठेपछि नेपाल बारले मंगलबार सल्लाहकार समितिको बैठक बोलाएको थियो । बारले यसअघि नै प्रधानन्यायाधीशको राजीनामा दिनुपर्ने आफ्नो निष्कर्ष राखिसकेको छ ।

बारका सल्लाहकारमध्ये वरिष्ठ अधिवक्ता शेरबहादुर केसीले भने अहिले राजीनामा माग्न नहुने सुझाव दिएका थिए । न्यायालयको कमी कमजोरी आंैल्याउने र सच्चाएर जान सकिने विषयमा हामीले अहिले नै राजीनामा माग्नु उचित नहुने तर्क राखेको केसीले बताए ।

त्यसैगरी सर्बोच्च अदालतका कर्मचारी ट्रेड युनियनले अदालतमा देखिएको समस्या हल नभए आन्दोलनमा उत्रिने चेतावनी दिएका छन् ।

मंगलबार विज्ञप्ति जारी गर्दै अदालतका कर्मचारीहरूले न्यायपालिकाको स्वतन्त्रताको रक्षा एवं सर्वसाधारणको न्याय पाउने अधिकारको संरक्षणका लागि आन्दोलन गर्न बाध्य हुने चेतावनी दिएका छन् ।

न्यायालयमा हाल देखिएको विकृति अन्त्य गर्ने सम्बन्धमा प्रधानन्यायाधीश र न्यायाधीशहरू जिम्मेवार बन्नुपर्ने बताएका छन् । उनीहरूले प्रधानन्यायाधीश चोलेन्द्रशमशेर जबरा र इजलास बहिष्कार गरेर ‘आन्दोलनरत’ न्यायाधीशहरूलाई अदालतमा देखिएको समस्या समाधान गर्न भनेका छन् ।