कोरोना खोप लगाएको तीन घण्टामा वृद्धको मृत्यु

काठमाडौँ- एकजना पुरूषको डोटीमा कोरोनाविरूद्धको दोस्रो मात्रा खोप लगाएको तीन घण्टामै मृत्यु भएको छ । आज बिहान साढे ११ बजे शिखर नगरपालिका–२ घगडाका ५८ वर्षीय लाल बहादुर बोगटीको मृत्यु भएको हो ।

शिखर नगरपालिकाका स्वास्थ्य एकाइ प्रमुख हरिष शाहले गाउँ नजिकै खोप केन्द्रमा भेरोसेलको दोस्रो मात्रा खोप लगाएर घर गएको केही समयमै बोगटीको मृत्यु भएको जानकारी दिएका छन् ।

शाहले भने, “बिहान साढे ८ बजे खोप लगाएर करिब पौने घण्टाको बाटो हिँडेर घर गएर खाना खाइसकेपछि उनको मृत्यु भएको बुझिएको छ।” उनको मृत्य खोपका कारण नभएर अन्य कारणले भएको हुनसक्ने शाहले बताएका छन् ।

शाहले भने, “खोपको एक भाइल (सिसी) मा दुई डोज खोप हुन्छ । उनलाई लगाएको भाइलबाट अर्को व्यक्तिलाई समेत लगाएको र अर्को व्यक्तिलाई कुनै किसिमको समस्या नदेखिएकाले खोपकै कारणले उनको मृत्यु भएको हो भन्न सकिदैन।”

उनी दीर्घरोगी भएको र उनको मृत्यु हृदयघातका कारणले भएको हुनसक्ने बताइएको छ । आफूहरुले पोष्टमार्टमका लागि जिल्ला अस्पताल लैजान सल्लाह दिए पनि परिवारले पोष्टमार्टम गर्न पर्दैन भनेर शव अन्त्यष्टिका लागि घाटमा लगिसकेको पनि शाहले जानकारी दिएका छन् ।