त्रिविका पूर्वनिर्धारित परीक्षा स्थगित नगर्ने निर्णय

काठमाडौँ- यसअघि तालिका सार्वजनिक गरी सञ्चालन गरिरहेका परीक्षा त्रिभुवन विश्वविद्यालयले स्थगित नगर्ने भएको छ । विश्वविद्यालयका परीक्षा नियन्त्रक पुष्पराज जोशीले कोभिड–१९ संकट व्यवस्थापन केन्द्र (सीसीएमसी)को सहमतिमै विश्वविद्यालयले भदौ ५ गतेसम्मको परीक्षा सञ्चालन गर्ने निर्णय गरेको बताएका छन् ।

विश्वविद्यालयमा हाल वार्षिक परीक्षा प्रणालीअन्तर्गत स्नातक तह प्रथम वर्षको परीक्षा सञ्चालन भइरहेको छ । साथै सेमेस्टर प्रणालीअन्तर्गत स्नातकोत्तर तहका विभिन्न संकायका परीक्षासमेत जारी छ ।

कतिपय परीक्षा विश्वविद्यालय क्याम्पस कीर्तिपुरमा सञ्चालन गरिएको र विद्यार्थी संख्या न्यून भएकाले सीसीएमसीले परीक्षा सञ्चालनका लागि स्वीकृति दिएको नियन्त्रक जोशीको भनाइ छ ।

उनले धेरै विद्यार्थी सहभागी रहेको स्नातक तह प्रथम वर्षको परीक्षा सकिएको बताउँदै अब न्यून विद्यार्थी अध्ययन गर्ने संकाय र विषयको परीक्षा मात्रै बाँकी रहेको जानकारी दिएका छन् ।

भदौ ५ गतेपछिको परीक्षाबारे भने कोरोना भाइरस संक्रमणको अवस्थालाई दृष्टिगत गरी निर्णय गरिने विश्वविद्यालयले जनाएको छ । विश्वविद्यालयले भदौ ११ गतेबाट स्नातक तहतर्फ एलएलबी प्रथम वर्षको परीक्षा कार्यक्रम राखेको छ। त्यसैगरी भदौ २७ गतेबाट एलएलबी दोस्रो वर्षको परीक्षा गर्ने कार्यतालिका सार्वजनिक गरिएको छ ।

भदौ २५ गतेबाट स्नातकोत्तर तह दोस्रो वर्षको परीक्षा गर्ने तयारी विश्वविद्यालयको भए पनि परीक्षा तालिका भने सार्वजनिक गरिएको छैन । यसअघि राष्ट्रिय परीक्षा बोर्डले साउन ३१ गतेबाट सञ्चालन हुने कक्षा १२ को परीक्षा कार्यक्रम स्थगित गर्ने निर्णय गरेको थियो ।