दार्चुला घटना : आज घटनास्थल जाँदैगृह मन्त्रालयको टोली

काठमाडौँ- दार्चुला घटनाबारे छानबिन गर्न गृह मन्त्रालयले गठन गरेको समितिका टोली घट्नास्थलतर्फ जाँदैछ । आज काठमाडौंबाट हिँड्ने टोली भोलि दार्चुला पुगेर काम थाल्ने बताइएको छ ।

काठमाडौंबाट टोली आज हिँड्ने र भोलिसम्म दार्चला आइपुग्ने समितिको सदस्य समेत रहेका दार्चुलाका सहायक प्रमुख जिल्ला अधिकारी जोत्सना भट्टले बताइन् । उनका अनुसार छानबिन समितिका संयोजक एवं गृह मन्त्रालयका सहसचिव जनार्दन गौतम नेतृत्वको टोली आज काठमाडौंबाट हवाई मार्गबाट धनगढी पुग्नेछ । त्यहाँबाट टोली भोलि दार्चुला पुग्नेछ ।

सहायक प्रमुख जिल्ला अधिकारी भट्टले भनिन्, “टोली भोलि चाँडै आइपुग्यो भने भोलि बाटै काम थाल्छौं । ढिला मात्रै आइपुगे पर्सिबाट काम थाल्नेछौं ।”

गृह मन्त्रालयले हिजो दार्चुला घटनाको छानबिन गर्नका लागि सहसचिव गौतमको संयोजकत्वमा पाँच सदस्यीय समिति गठन गरेको थियो । समितिमा गौतमको संयोजकत्वमा सुदूरपश्चिम प्रदेशका प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी भट्ट सदस्य छन् । घटनाबारे सत्यतथ्य बुझेर १० दिनभित्र प्रतिवेदन पेश गर्न समितिलाई म्याद दिइएको छ ।

दार्चुलामा महाकाली नदी तर्ने क्रममा भारतीय सीमा सुरक्षा बल (एसएसबी)ले तुइन खोलिदिँदा व्याँस गाउँपालिका–२ मालगाउँका जयसिंह धामी महाकाली नदीमा बेपत्ता भएका छन् । बेपत्ता भएको घटनाबारे भारतीय पक्षले एसएसबीको घटनामा कुनै संलग्नता नरहेको भन्दै लिखित पत्र पठाएको छ । घटनाका दोषीलाई कारबाही गर्न ब्यापक विरोध भइरहेको छ ।