असोजदेखि काेराेनाकाे तेस्रो लहर आउने स्वास्थ्य मन्त्रालयको प्रक्षेपण

काठमाडौँ- कोभिड-१९ को वर्तमान अवस्था तथा संक्रमण दरका आधारमा अगामी असोज दोस्रो सातादेखि नेपालमा तेस्रो लहर आउने स्वास्थ्य तथा जनसंख्या मन्त्रालयले प्रक्षेपण गरेको छ । उक्त प्रक्षेपणको विषयमा संसदको शिक्षा तथा स्वास्थ्य समितिमा मन्त्रालयले जानकारी दिएको छ ।

मन्त्रालयले सम्भवत: असोज १५ देखि मंसिर महिनासम्म तेस्रो लहर आउन सक्ने प्रक्षेपण गरेको हो । संसदीय समितिमा बुझाइएको प्रतिवेदनमा भनिएको छ, “कोभिड-१९ को वर्तमान अवस्था तथा संक्रमणको दरलाई हेर्दा तेस्रो लहर सम्भवत असोज १५ देखि मंसिर महिनामा पुन:आउन सक्दछ।”

कोरोनाका भेरियन्टको स्वरुप र प्रकृति, खोपको उपलब्धता र प्रयोग, सामाजिक गतिविधि तथा जनस्वास्थ्यका आधारभुत मापदण्डको पालनाको स्तरले तेस्रो लहर आउने समय केही अगाडि पछाडि धकेल्न सकिने विषयमा पनि समितिमा मन्त्रालयले जानकारी दिएको छ । मन्त्रालयले हालको स्थिर संक्रमणको आधारमा हेर्दा आगामी पाँच महिनामा झण्डै २ लाख संक्रमित थपिने प्रक्षेपण पनि गरेको छ। मन्त्रालयले बुझाएको प्रतिवेदनमा भनिएको छ, “हालको पछिल्ला हप्ताहरुको स्थिर संक्रमणको आधारमा १ लाख ९३ हजार ८५६ नयाँ संक्रमित थपिने सम्भावना छ।”

मन्त्रालयको नीति योजना तथा अनुगमन महाशाखाका प्रमुख डा गुणराज लोहनीले मन्त्रालयले अबको पाँच महिनाको अवधिमा थपिने नयाँ संक्रमितमध्ये ३८ हजार ७ सय ७१ जनालाई अस्पताल भर्ना गरी उपचार गर्नुपर्ने र ती मध्ये ९ हजार ७ सय ९३ जनालाई सघन उपचार गर्नुपर्ने अनुमान रहेको जानकारी दिएका छन् ।

असोजसम्म कोभ्याक्स सुविधा, वैदेशिक अनुदान र खरिदबाट गरी १ करोड ५ लाख ४८ हजार डोज खोप प्राप्त हुने डा लोहनीले जानकारी दिएका छन् ।

कोभ्याक्स सुविधाअन्तर्गत जापानबाट १६ लाख डोज एस्ट्राजेनेका खोप प्राप्त हुने बताए । जापानबाट प्राप्त हुने खोप भदौ पहिलो सातासम्म आइपुग्ने उनको भनाइ छ । यस्तै, लोहनीले कोभ्यास सुविधाअन्तर्गत थप ३ लाख ४८ हजार डोज खोप भदौको अन्तिम साता प्राप्त हुने जानकारी दिएका छन् ।

वैदेशिक सहायताअन्तर्गत चीन सरकारबाट १६ लाख डोज खोप प्राप्त हुने उनको भनाइ छ । चीनबाट अनुदानमा प्राप्त हुने खोप साउन अन्तिम सातासम्म नेपाल आइपुग्ने लोहनीले जानकारी दिए ।

असोजसम्म खरिदबाट ७० लाख डोज खोप प्राप्त हुने लोहनीको भनाइ छ । नेपालले भारतबाट पहिले नै खरिद गरेको, तर प्राप्त हुन नसकेको १० लाख डोज कोभिसिल्ड खोप भदौको दोस्रो साता प्राप्त हुने लोहनीले बताए । यस्तै, चीनबाट खरिद गरिएको ६० लाख डोज भेरोसेल खोप भदौ मसान्तसम्म प्राप्त भइसक्ने उनको भनाइ छ ।

डा लोहनीले असोजदेखि चैतसम्म ३ करोड २३ लाख डोज खोप प्राप्त हुने जानकारी दिए । जसअन्तर्गत कोभ्याक्सबाट १ करोड १३ लाख डोज निःशुल्क प्राप्त हुने उनको भनाइ छ । कोभ्याक्सबाटै लागत सहभागितामा कोभिसिल्ड, मोडर्ना, फाइजर, जनसन, सिनोभ्याक्स आदि गरी १ करोड ५० लाख डोज खोप प्राप्त हुने लोहनीको भनाइ छ ।