उपत्यकाका प्रमुख जिल्ला अधिकारीहरुको निषेधाज्ञाबारे निर्णय गर्न बैठक बस्दै

काठमाडौँ- उपत्यकाका तीन जिल्लाका प्रमुख जिल्ला अधिकारीको निषेधाज्ञाबारे निर्णय गर्न बैठक बस्ने भएको छ । आज काठमाडौँ, भक्तपुर र ललितपुरका प्रमखु जिल्ला अधिकारीहरुको बैठक बस्न लागेको हो ।

तीन जिल्लाका प्रजिअहरुको बैठक आज बस्ने तर समय भने तय भइनसकेको काठमाडौँका प्रमुख जिल्ला अधिकारी कालीप्रसाद पराजुलीलेजानकारी दिएका छन् ।

यसअघि थपिएको निषेधाज्ञाको अवधि आज मध्यरात १२ बजेबाट सकिन लागेसँगै त्यसबारे निर्णय गर्न बैठक बस्न लागेको उनले जानकारी दिएका थिए ।

अब १५ दिन निषेधाज्ञा थप गर्ने र लामो दूरीका यातायात पनि खुला गर्नेबारे छलफल भइरहेको ललितपुरका प्रमुख जिल्ला अधिकारी ढुण्डीप्रसाद निरौलाले बताए ।

लामो दुरीका सवारी खुला नगरेको भएपनि विभिन्न बाहनामा सञ्चालन भइरहेको र यात्रुले सास्ती पाएको गुनासो आएकाले त्यसबारे निर्णय गर्नुपर्ने देखिएको जनाए । तर लामो दूरीको सवारी सञ्चालन अन्य जिल्लाहरुसँग पनि सम्बन्धित रहेकोले के गर्ने भन्नेबारे छलफल गरिने उनले बताएका छन् ।

कोरोनाको दोस्रो लहरसँगै काठमाडौँ उपत्यकामा वैशाख १६ गतेदेखि लगाइएको निषेधाज्ञा विभिन्न समयमा थप गर्दै जारी राखिएको छ । तर, निषेधाज्ञा खुकुलो गरिएको छ । उपत्यकामा सवारी साधन, व्यापार व्यवसाय सञ्चालनमा आएका छन् भने शैक्षिक संस्था, फिल्म हल लगायत बन्द रहेका छन् ।