अब निर्माण क्षेत्र र उद्योग पनि खुला गरिने

काठमाडौँ- कोरोना नियन्त्रणका लागि जारी निषेधाज्ञालाई सरकारले क्रमशः खुकुलो बनाउँदै जाने नीति तय गरेको छ । निर्माण क्षेत्र र उद्योग खुला गर्ने निर्णय कोभिड–१९ व्यवस्थापन निर्देशक समितिको दोस्रो बैठकले गरेको छ ।

प्रधानमन्त्री निवास बालुवाटारमा बिहीबार बसेको बैठकले यो सातासम्म जारी लकडाउनपछि केही खुकुलो बनाउन लागेको हो । सरकार एक सातासम्मको संक्रमणको स्थिति विश्लेषण गरेर निर्माण क्षेत्र र उद्योग खुला गरेर जानेमा पुगेको छ ।

समितिको बैठकले अधिक संख्यामा नेपाली श्रमिक रहेका टर्की, कतार, साउदी अरेबिया, यूएई, जापान र मलेसियाजस्ता देशमा हवाई उडान पुनः सञ्चालन गर्ने निर्णय गरेको छ । वैदेशिक रोजगारीमा गएका तर विभिन्न कारणले होटल क्वारेन्टाइनमा बस्न नसक्ने कामदारका लागि सहयोग रकम उपलब्ध गराउने निर्णयसमेत बैठकले गरेको छ ।

त्यस्तै, गैरआवासीय नेपालीहरूबाट पठाइन लागेको अक्सिजन सिलिन्डर ल्याउन हवाई ढुवानी भाडा सरकारले उपलब्ध गराउने समेत निर्णय बैठकले गरेको छ ।