आज र भोलि खोप काठमाडौं महानगरले अभियान सञ्चालन गर्दै

काठमाडौँ- आज र भोलि काठमाडौँ महानगरपालिकाले कोरोनाविरुद्धको खोप लगाउने भएको छ ।

महानगरका स्वास्थ्य विभाग प्रमुख हरिबहादुर कुँवरले खोप अभावका कारण रोकिएको खोप अभियान अन्तर्गत आज र भोलि काठमाडौंका विभिन्न स्थानहरुमा खोप लगाउने जानकारी दिएका छन् ।

उनका अनुसार जेठ २५ गते काठमाडौं उपत्यकालगायत देशभर सुरु भएको खोप अभियान काठमाडौंमा खोप अभावका कारण स्थगित भएको थियो ।

कुँवरका अनुसार खोप अभाव भएपछि जेठ २७ गते सूचना जारी गरेर नै स्थगित गरिएको थियो । उनी खोकिएको खोप जेठ ३१ गते सोमबार र असार १ गते मंगलबार पुनः संचालनमा ल्याउन लागेको बताउँछन् ।

उनका अनुसार महानगरपालिकाले ६०–६१ वर्ष उमेर समूहका नागरिक, भेरोसेलको पहिलो मात्रा लगाएका व्यक्ति, कोरानाका बिरामीको उपचार जाँच र प्रत्यक्ष उपचारमा संलग्न चिकित्साकर्मी, प्यारामेडिक्स, नर्सिङका विद्यार्थीलाई भेरोसेल खोपको पहिलो मात्रा लगाइने छ ।

खोप लगाउन वीर अस्पताल, महाराजगञ्जस्थित टिचिङ अस्पताल, सिभिल अस्पताल र सैनिक अस्पतालमा खोप लगाइनेछ । पहिलो पटक भने सबै वडामा खोप लगाइएको थियो ।