तेस्रो पटक केपी शर्मा ओली प्रधानमन्त्रीमा नियुक्त: भोलि सपथ लिने

काठमाडौँ- नेपालको प्रधानमन्त्रीमा नेकपा एमालेका अध्यक्ष केपी शर्मा ओली तेस्रो पटक नियुक्त भएका छन् । राष्ट्रपति विद्यादेवी भण्डारीले ओलीलाई संसदको सबैभन्दा ठूला दलको नेताको हैसियतमा प्रधानमन्त्रीमा नियुक्त गरेकी हुन् ।

राष्ट्रपति भण्डारीले भण्डारीले ओलीलाई नेपालको संविधानको धारा ७६ को उपधारा (३) बमोजिम नियुक्त गरेकी हुन् । प्रधानमन्त्रीमा नियुक्त भएका ओलीले भोलि राष्ट्रपतिको कार्यालय शीतल निवासमा पद तथा गोपनीयताको सपथ लिनेछन् ।

प्रतिनिधिसभाबाट विश्वासको मत गुमाएका प्रधानमन्त्री ओली गत सोमबार स्वतः पदमुक्त भएका थिए । त्यसपछि राष्ट्रपति भण्डारीले नेपालको संविधानको धारा ७६ को उपधारा (२) बमोजिम नयाँ सरकार गठनका लागि बहुमत जुटाउन तीन दिनको समय दिएकी थिइन् ।

उक्त तीन दिनको समय आजै राति नौ बजे सकिएको छ। तिन दिनको समयमा विपक्षी दलहरु कांग्रेस, माओवादी र जनता समाजवादी पार्टीको उपेन्द्र यादव समूहले बहुमत जुटाउन नसक्दा ओली नै संसदको सबैभन्दा ठूलो दलको नेताका रुपमा प्रधानमन्त्रीमा नियुक्त भएका हुन्।