उपत्यकामा निषेधाज्ञा थप्ने तयारी, सीडीओको बैठक बस्दै

काठमाडौँ- काठमाडौं उपत्यकामा कोभिड–१९ को संक्रमण नघटेपछि फेरि निषेधाज्ञा थपिने भएको छ। निषेधाज्ञा थप्ने निर्णय गर्न तीन जिल्लाका प्रमुख जिल्ला अधिकारीको बैठक बस्न लागेको छ ।

कोरोनाभाइरसको संक्रमण बढेपछि १६ वैशाखदेखि काठमाडौं, भक्तपुर र ललितपुरमा निषेधाज्ञा जारी गरिएको थियो । दुई साता लामो निषेधाज्ञा ३० वैशाखमा सकिँदै छ ।

कोरोना संक्रमण नरोकिएपछि फेरि निषेधाज्ञा थप्न लागिएको हो । काठमाडौंका प्रमुख जिल्ला अधिकारी कालीप्रसाद पराजुलीले यसका लागि आज काठमाडौं, भक्तपुर र ललितपुरका प्रमुख जिल्ला अधिकारीको बैठक बस्न लागेको बताए । प्रजिअ पराजुलीले भने, “कोरोना संक्रमण नघटेकाले उपत्यकामा निषेधाज्ञा थप्न लागेको हौं। कति दिन थप्ने भन्ने निर्णय गर्नका लागि बैठक बस्दै । ”

यसअघि सोमबार नै जिल्ला कोभिड–१९ संकट व्यवस्थापन केन्द्रले काठमाडौंमा दुई साता निषेधाज्ञा थप्न सिफारिश गरेको थियो । त्यहि सिफारिशलाई आधार बनाएर आज तीनै जिल्लाका प्रमुख जिल्ला अधिकारीको बैठकले निषेधाज्ञा थप्ने भएको हो ।

काठमाडौंसँगै देशका अन्य जिल्लामा संक्रमण घटेको छैन । सोमबार देशभर नौ हजार दुई सय ७१ जनामा कोरोना संक्रमण देखिएको थियो ।

कोरोना संक्रमण नियन्त्रणका लागि अहिले देशभरका ६९ जिल्लामा निषेधाज्ञा लागू भएको गृह मन्त्रालयले जनाएको छ । कोरोना संक्रमणको जोखिम कम रहेका आठ जिल्लामा मात्रै निषेधाज्ञा लगाइएको छैन ।