१० वर्षसम्म निःशुल्क उपचार गर्ने सम्झौता भएपनि चरिकोट अस्पताल बिरामीसँग पैसा असुल्दै

काठमाडाैं – १० वर्षसम्म निःशुल्क स्वास्थ्य सेवा उपलब्ध गराउने सर्तअनुसार स्वास्थ्य मन्त्रालयसँग सम्झौता गरेको न्याय हेल्थ नामक गैरसरकारी संस्थाले प्रस्तावित चरिकोट अस्पतालमा बिरामीसँग पैसा असुल्ने गरेको छ ।

प्राथमिक स्वास्थ्य केन्द्र चरिकोटलाई अमेरिकी दातृ निकायको सहयोगमा १० वर्षसम्म निःशुल्क गुणस्तरीय स्वास्थ्य सेवा प्रवाह गर्ने भनिए पनि न्याय हेल्थले उल्टै बिरामीसँग पैसा असुलेको तथ्य खुलेको हो ।

गत १३ जेठमा हात भाँचिएर अस्पताल आएका दोलखा शैलुङ गाउँपालिका–४ का फुर्वा तामाङलाई धरौटी भन्दै न्याय हेल्थले १० हजार रुपैयाँ लिएको छ । सो संस्थाले उपलब्ध गराएको रसिदमा लेखा प्रमुख गोपी श्रेष्ठको हस्ताक्षर छ ।

श्रेष्ठले स्वास्थ्य सेवा प्रमुखको निर्देशनमा आफूले बिरामीसँग पैसा लिएको स्विकारे । हात भाँचिएर अस्पताल पुगेका तामाङलाई सुरुमा जिल्लामा उपचार नहुने भन्दै काठमाडौं जान सुझाएको अस्पताल प्रशासनले १० हजार रुपैयाँ खर्च गरे उपचार हुने बताएपछि उनी रकम बुझाएर भर्ना भएका थिए ।

दातृ निकायको सहयोगमा वर्षौंदेखि निस्शुल्क सेवा दिँदै आएको संस्थाले एकाएक बिरामीसँग रकम असुलेपछि दोलखामा आलोचना सुरु भएको छ । लकडाउनका वेला पनि एकैचोटि ३७ जना स्वास्थ्यकर्मी हटाउने निर्णय गरेर विवादमा आएको अस्पतालमा स्वास्थ्यकर्मीहरू निरन्तर आन्दोलनमा छन् ।

प्रस्तावित चरिकोट अस्पतालका मेडिकल निर्देशक एवं न्याय हेल्थ दोलखाका स्वास्थ्य सेवा प्रमुख डा। विनोद दंगालले भाँचिएको हातमा पाता राख्नुपर्ने भएकाले खरिद गर्न रकम लिएको स्विकार गरे ।

सामग्री किन्न लिएको रकम किन न्याय हेल्थको रसिद प्रयोग गर्नुभयो भन्ने प्रश्नमा डा।दंगालले गल्ती भएको स्विकारेका छन् । उनले अस्पतालले व्यावहारिकताका आधारमा बिरामीलाई सहज हुने गरी काम गरेको दाबी पनि गरे । अस्पतालमाथि धेरै बिरामीसँग रकम असुल्ने गरेको आरोप लाग्दै आएको छ । नयाँपत्रिका दैनिकबाट