क्यान्सर अस्पतालमा बिजोग, अस्पतालबाहिरै बिरामीलाई सुताएर सडकमा खाना बनाउनुपर्ने

चितवन – चितवनमा रहेको बीपी कोइराला मेमोरियल क्यान्सर अस्पतालमा भर्ना भएका बिरामी र कुरुवालाई विभिन्न समस्या भएको छ । लकडाउनका कारण उपचारमा हुने ढिलाइ र होटल तथा रेस्टुराँ बन्द हुँदा बिरामीका साथै आफूहरूले पनि अस्पतालबाहिर बसेर पालो कुर्नुपरेको कुरुवाहरूले बताएका छन्

केही कुरुवाले अस्पतालबाहिरै बिरामीलाई सुताएर सडक किनारामा खाना पकाउनुपर्ने बाध्यता रहेको बताएका छन् । बिरामीलाई खाना बनाउन र खुवाउनुपर्ने र कपडा धुनुपर्ने भएपपिन राम्रो र सुरक्षित ठाउँ नहुँदा खुला ठाउँमा खाना पकाएर खानुपर्ने बाध्यता रहेको कैलालीबाट आफन्तको उपचारका लागि चितवन आएका राम चौधरीले बताए ।

अस्पतालमा आएका बिरामी र कुरुवा खुला चौरमा खाना पकाएर खाने र रातमा अस्पतालको पिँढीमा सुत्ने गरेका सप्तरी राजविराजका बालेश्वर रामले बताए ।

अस्पतालको ढिलासुस्तीले बिरामीलाई समस्या परेको रुकुमका वसन्त मल्लले बताए। अस्पतालले भने कोरोनाभाइरसका कारण सीमित जनशक्तिका आधारमा काम गर्नुपर्दा उपचारमा केही ढिलो भएको हुन सक्ने बताएको छ।

अस्पतालका अध्यक्ष डाक्टर निर्मल लामिछानेलेले स्वास्थ्य तथा जनसङ्ख्या मन्त्रालयको निर्देशनअनुसार नै केही स्वास्थ्यकर्मीलाई आकस्मिक जगेडामा राखिएको बताए। बीबीसी नेपाली सेवा ।