चरिकोट अस्पतालले एकैपटक ३७ स्वास्थ्यकर्मी हटायो, तीन दिनदेखि अस्पतालमा नाराजुलुस

दोलखा – दोलखामा रहेको चरिकोट अस्पतालमा कार्यरत ३७ जना स्वास्थ्यकर्मी हटाइएको छ । लकडाउनको समयमा बजेट अभाव भएको बहाना बनाएर स्वास्थ्यकर्मी हटाएको विरोधमा तीन दिनदेखि अस्पताल तनावग्रस्त छ ।

२०७२ माघदेखि प्राथमिक स्वास्थ्य केन्द्र चरिकोटसँगको सहकार्यमा न्याय हेल्थ नेपालले सार्वजनिक–निजी साझेदारीको अवधारणाअनुसार अस्पताल सञ्चालन गर्दै आएको छ । एक सय ३० भन्दा धेरै स्वास्थ्यकर्मीमध्ये ३७ जनालाई कोरोना महामारीका वेलामा हटाइएको हो ।

सेवाबाट हटाइएका स्वास्थ्यकर्मीले नेपाल सरकार र न्याय हेल्थबीच भएको सम्झौताअनुसार अस्पताल चल्नुपर्ने, अस्पतालभित्र यातायात, खाना, खरिदलगायतका शीर्षकमा व्यापक अनियमितता भएको भन्दै निष्पक्ष छानबिन गर्न सरोकारवाला निकायको ध्यानाकर्षणसमेत गराएका छन् ।

स्वास्थ्यकर्मीले मापदण्डविनै कर्मचारी हटाएको र तल्लो तहका कर्मचारीलाई विभेद र दुर्व्यवहार गरेको भन्दै न्याय हेल्थका स्वास्थ्य सेवा प्रमुख रहेका अस्पतालका मेडिकल निर्देशक विनोद दंगालको राजीनामा माग गरेका छन् ।