नेपाल भारत सीमावर्ती जिल्लाहरुमा नेपाली सेना परिचालन

कपिलवस्तु । कोरोना संक्रमण नियन्त्रणका लागि सीमावर्ती जिल्लाहरुमा नेपाली सेना परिचालन गरिएको छ । कपिलवस्तु जिल्लाको कृष्णनगर सीमा नाका र मर्यादपुर सीमा नाकामा होल्डिंग क्याम्प राख्ने गरी सेनालाई परिचालन गरिएको जिल्ला प्रशासन कार्यालयले जनाएको छ ।

नेपाली सेनाले यशोधरा गाउँपालिका मर्यादपुरको सुठौलीस्थित पशुपति शिक्षा मन्दिरमा होल्डिंग क्याम्प स्थापना गरि सकेको यशोधरा गाउँपालिकाले जनाएको छ ।

नेपाली सेनाका मेजरको कमाण्डमा २० जना सेनाहरुलाई होल्डिंग क्याम्प संचालनका लागि खटाईएको छ । सेनाले सीमा क्षेत्रको दश गजासंगैको नेपाल प्रवेश मुख्य गेटसँगै हेल्थ डेक्स स्थापना गरेको छ । भारतका विभिन्न शहरबाट आउने नेपाली नागरिकलाई हेल्प डेक्समा स्वास्थ्य चेकअप गरी होल्डिंग क्याम्प सम्म पुर्याईने छ ।

होल्डिंग क्याम्पमा भारतबाट आएका सर्वसाधारणहरुको यात्रा विवरण तथा नाम ठेगाना संकलन गरी सम्बन्धित गाउँपालिका तथा नगरपालिका पुर्‍याउने प्रवन्ध मिलाइएको यशोधरा गाउँपालिका ७ का अध्यक्ष चन्द्र प्रकाश दुवेले बताए ।

कोरोना संक्रमण नियन्त्रणका लागि प्रयास त गरियो तर यो प्रयास ढिलो भयो, वडाध्यक्ष दुवेले भने, ‘एक महिना अघि सम्म सीमा क्षेत्रमा दैनिक हजारौं सर्वसाधारणहरु भारतबाट आएका थिए। होल्डिंग क्याम्पको आवश्यकता त्यो बेला थियो । कोरोना संक्रमणका लागि सरकारले नेपाली सेनालाई सीमा क्षेत्रमा खटाएको प्रति स्थानीयले स्वागत गरेका छन् ।

तर सरकारको यो कदम भने ढिलो भएको कपिलवस्तु नगरपालिका १ का स्थानीय अगुवा युवा दिपक पाण्डेयले बताए । होल्डिंग क्याम्पमा ५० जना सम्ममा बस्ने व्यवस्थापन गरिएको छ । क्याम्पमा आउने सर्वसाधारणहरुको खानपिनको लागि यशोधरा गाउँपालिकाले प्रवन्ध मिलाएको गाउँपालिकाका प्रमुख गिरजेश पाण्डेयले बताए ।

कपिलवस्तु जिल्ला मुलुकमै कोरोना संक्रमित बढी भएको जिल्लामा परेको छ । जिल्लामा हालसम्म ४ सय २ जनामा कोरोना संक्रमण देखिएको छ । जिल्लाका विभिन्न पालिकाहरुले निर्माण गरेको क्वारेन्टाइनमा भारतबाट फर्केका करीब ४ हजार सर्वसाधारणलाई राखिएको छ । अन्नपूर्ण पोष्ट दैनिककबाट ।