संक्रमित ४ जनानै निको भएसंगै भक्तपुर कोरोना संक्रमणबाट मुक्त

भक्तपुर- भक्तपुर जिल्ला कोरोना भाइरसको संक्रमितबाट मुक्त भएको छ।

भक्तपुरका संक्रमित ४ जनानै निको भएर घर फर्किएपछि भक्तपुर जिल्ला कोरोना भाइरस मुक्त भएको हो ।

जेठ ६ मा संक्रमण पुष्टि भएका भक्तपुर नगरपालिका–५, भेलेखेलका ५२ वर्षीय पुरुष र जेठ ९ मा संक्रमण पुष्टि भएका भक्तपुर नगरपालिका–९ की महिला जनप्रतिनिधि कोरोनालाई जितेर घर फर्किएपछि भक्तपुर कोरोना संक्रमितमुक्त जिल्ला भएको हो ।

शनिबार काठमाडौंको कोरोना भाइरस युनिफाइड अस्पतालमा उपचार गरिरहेका भक्तपुर नगरपालिका–५, भेलेखेलका ५२ वर्षीय पुरुषडिस्चार्ज भएका हुन् ।

त्यसैगरी महिला जनप्रतिनिधि पाटन अस्पतालमा उपचारपछि स्वाबको परीक्षणका क्रममा नतिजा नेगेटिभ आएपछि भक्तपुर नगरपालिका–९ की महिला घर फर्किएकी छिन् ।

गत साता नै मध्यपुर थिमि नगरपालिका–४ शंखधरचोक बस्ने सुनसरीको २५ वर्षीया महिला र रामेछाप घरभई चाँगुनारायण नगरपालिका–१ दुवकोट बस्ने २७ वर्षीय पुरुष कोरोनालाई जितेर घर फर्किसकेका थिए ।