बेल्जियमका राजकुमारलाई कोरोना संक्रमण, जसले लकडाउनमा पनि पार्टी गरेका थिए

एजेन्सी – बेल्जियमका राजकुमारलाई कोरोना भाइरसको संक्रमण पुष्टि भएको छ । उनी लकडाउनको समयमा पनि स्पेनको एक पार्टीमा सहभागी भएका थिए ।

२८ वर्षका राजकुमार योआखिमलाई कोरोना भाइरसको संक्रमण देखिएको बेल्जियमको राजदरबारले जनाएको छ । उनी मे २६ मा इन्टर्नसिपका लागि बेल्जियमबाट स्पेन गएको दरबारले जनाएको छ ।

त्यसको दुई दिनपछि उनी स्पेनको दक्षिणी शहर कोर्दोबामा भएको एक पार्टीमा सहभागी भएका थिए । त्यसबेलासम्म उनको परीक्षण भएको थिए ।

बेल्जियमका राजा फिलिपेका भतिज राजकुमार योआखिम सहभागी भएको पार्टीमा २७ जना रहेको स्पेनिस सञ्चारमाध्यमले जनाएका छन् ।

कोर्दोबाको लकडाउन नियम अनुसार सो संख्यामा मानिस सहभागी भएर पार्टी गर्नु गैरकानूनी हो । स्पेनिस प्रहरीले सो पार्टीका सम्बन्धमा अनुसन्धान गरिरहेको छ ।