माइती आएकी छोरीलाई अँगालो मार्दा आमा पुगिन् क्वारेन्टाइन

अछाम – धनगढीबाट माइत आएकी छोरीलाई अँगालो मार्दा आमाछोरी क्वारेन्टाइनमा बस्न बाध्य भएका छन् । आफ्नै छोरीलाई माया गर्दा घरमै रहेकी आमा क्वारेन्टाइनको बास होला भन्ने कल्पनासम्म गरेकी थिइनन् ।

तर, बसबाट झरेपछि छोरीलाई मायाले अँगालो मार्दा ४१ वर्षीया महिलालाई चौरपाटी गाउँपालिका–६ दुनीको क्वारेन्टाइन बस्न बाध्य भएकी छिन् ।

माइती घर आएकी छोरीलाई साथमा ल्याउन चौखुट्टे गएकी दुनी निवासी ती महिलाले छोरीलाई छोएको भन्दै क्वारेन्टाइनमा राखिएको वडा अध्यक्ष मने साउदले जानकारी दिए ।

वडा अध्यक्ष साउदका अनुसार धनगढीबाट अरुसँगै बसमा आएकी युवतीलाई मात्र क्वारेन्टाइनमा राख्ने तयारी भए पनि आमाले छोएका कारण कोरोनाको सम्भावित सङ्क्रमणको आशङ्कामा दुवैलाई क्वारेन्टाइनमा राखिएको छ । गोरखापत्र दैनिकले खबर लेखेको छ ।