‘रुकुमपश्चिम हत्याकाण्ड बर्बर अपराध हो’ – साझा पार्टी

काठमाडौँ-साझा पार्टीले रुकुम पश्चिममा आफ्नो प्रेमिकासँग बिहे गर्न गएका भनिएका दलित युवा नवराज विश्वकर्मा र उनका दुईजना साथीहरूको हत्या भएको घटना मानवताविरुद्धको बर्बर र नृशंस अपराधको संज्ञा दिएको छ।

पार्टी संयोजक रवीन्द्र मिश्रद्वारा जारि प्रेस बिज्ञप्तिमा सत्तारूढ दलको वडा अध्यक्षसमेत आक्रमणमा संलग्न भएको समाचार झनै चिन्ताजनक भएको उल्लेख छ।

‘घटनाबारे छानबिन गर्न गृह मन्त्रालयले पाँच सदस्यीय समिति गठन गरेकाे त छ, तर घटनालाई सामसुम पार्न राजनीतिक सकृयता बढेको चर्चा चलिरहँदा छानबिन समिति राजनीतिक प्रभावबाट मुक्त होस् भनी साझा पार्टी खबरदारी गर्दछ।’ बिज्ञप्तिमा उल्लेख छ।

जातीय विभेद तथा छुवाछुत अन्त्य गर्नको लागि संवैधानिक र कानूनी व्यवस्था गरेरमात्र नपुग्ने उल्लेख गर्दै त्यसको प्रभावकारी, व्यवहारिक कार्यान्वयनका लागि उपयुक्त संयन्त्रको निर्माण गर्न र दोषीमाथि कडाभन्दा कडा सजायँको माग समेत गरेको छ।

‘साझा पार्टी छुवाछुत तथा जातिय विभेदविरुद्ध शुन्य सहनशीलतामा विश्वास गर्दछ र आफ्ना सदस्यहरु लगायत आम सर्वसाधारणलाई अग्रपंक्तिमा रहेर विभेदविरुद्ध काम गर्न आग्रह गर्दछ।’ बिज्ञप्तीमा जनाइएको छ ।