ओबामाले फेरि गरे डोनाल्ड ट्रम्पको आलोचना

एजेन्सी – अमेरिकाका पूर्व राष्ट्रपति बाराक ओबामाले राष्ट्रपति डोनाल्ड ट्रम्प प्रशासनको फेरि गम्भीर आलोचना गरेका छन् ।

कोरोना भाइरसको महामारी नियन्त्रणको प्रयासमा वर्तमान प्रशासनले गम्भीर त्रुटी गरेको भन्दै उनले एक हप्ताको अवधिमा ट्रम्प प्रशासनमाथि दोस्रो पटक आलोचना गरेका हुन् ।

पूर्व राष्ट्रपति ओबामाले यो वर्ष कलेजबाट दीक्षित भएकाहरुको भर्च्यूअल दीक्षान्त समारोहको प्रारम्भमा गरेको सम्बोधनमा ट्रम्प प्रशासनको आलोचना गरेका हुन् ।

उनले दीक्षित भएका विद्यार्थीलाई सम्बोधन गर्दै सत्ताको बागडोर सम्हालेका व्यक्तिले सधैँ आफूले के गरिरहेको छु भन्ने थाहा नपाउने बताएका हुन् ।

ट्रम्प प्रशासनले कोभिड–१९ नियन्त्रणमा लिनका लागि गरेको प्रयास अपर्याप्त भएको ओबामाले उल्लेख गरेका छन् ।

आउँदो नोभेम्बरमा हुने राष्ट्रपति चुनावमा जो बाइडेनलाई समर्थन गर्ने बताइसकेका ओबामा पछिल्लो समय खुलेर ट्रम्पको विरोधमा उत्रन थालेका छन् ।