बेलहियामा अलपत्र परेका ५१० जनाको उद्दार

बुटवल, ३१ वैशाख । रूपन्देहीको सीमानाका बेलहियामा अलपत्र परेका ५१० जनाको उद्दार गरिएको छ। भारतका विभिन्न ठाउँबाट आएर  सीमानाकामा बसेका उनीहरूलाई रूपन्देहीका सिद्धार्थनगर र तिलोत्तमा नगरपालिकाले स्थानीय प्रशासनको सहमतिमा उद्धार गरेका हुन्।

कोरोना भाईरसको संक्रमण बढ्दै गएपछि घर जाने उदेश्यले पैदलै र मालबाहक गाडीमा सीमासम्म आएका उनीहरुलाई गृहमन्त्रालयको आदेश भन्दै प्रहरीले रोकेपछि  सीमापारीमा रहेकाे क्वारेन्टाइनमा बसेका थिए।

उनीहरुलाई सिद्धार्थनगर नगरपालिका र तिलोत्तमा नगरपालिकाका विभिन्न क्वारेन्टाईनमा राखिने छ। नेपाल ल्याईएकाहरु सबै भारतीय क्वारेन्टाईनमा २१ दिन बसेकाहरु हुन्।

सिद्धार्थनगर र तिलोत्तमाका नगरप्रमुख तथा उपप्रमुखको टोली बेलहिया पुगेर उनीहरूलाई ल्याइएको हो।

नेपाल ल्याईएका ५ सय १० जना मध्ये २ सय ३३ जनालाई तिलोत्तमा नगरपालिकाका २ वटा क्वारेन्टाईनमा राखिने छ भने बाँकी २ सय ७७ जनालाई सिद्धार्थ नगरपालिकाका २ वटा क्वारेन्टाईनमा राखिने छ।