सुनौली नाकामा अलपत्रलाई नेपाल भित्र्याउने तयारी

रुपन्देही — नेपाल–भारत मुख्य सीमा नाका सुनौंलीलगायत दशगजा क्षेत्रमा प्रवासी नेपालीको चाप बढेपछि क्वारेन्टाइनस्थल र पीसीआर परीक्षणको व्यवस्था गरेर भित्र्याउने तयारी गरिएकाे छ ।

भारतले आजबाट प्रवासी कामदार लक्षित गरेर रेल सेवा सुरु गरे पनि सीमामा चाप बढने देखिएको छ । त्यसले भद्रगोल अवस्था सृजना हुने भएपछि रुपन्देही प्रशासन र स्थानीय तहले व्यवस्थित रुपमा उनीहरुलाई ल्याउने विषयमा छलफल गरेका छन् ।

यसरी आउनेको स्वास्थ्य परीक्षणका लागि पर्याप्त पीसीआर किट उपलब्ध भएमा रुपन्देहीका विभिन्न पालिकाका क्वारेन्टाइनमा व्यवस्थापन गर्ने तयारी थालिएको छ ।

भारतीय कवारेन्टाइनमा २१ दिन बिताएका व्यक्तिलाई यहाँका क्वारेन्टाइनमा पीसीआर परिक्षणका लागि तयारी थाल्न स्थानीय तहलाई निर्देशन गरिएको प्रमुख जिल्ला अधिकारी महादेव पन्थले बताए ।