बाराक ओबामाद्धारा डोनाल्ड ट्रम्पको कडा आलोचना, कोरोना नियन्त्रणको प्रयास अस्तव्यस्त भएको आरोप

एजेन्सी – अमेरिकाका पूर्व राष्ट्रपति बाराक ओबामाले कोरोना भाईरस संक्रमण नियन्त्रणका लागि अमेरिकाले गरिरहेको प्रयास अस्तव्यस्त भएको भन्दै कडा आलोचना गरेका छन् ।

आफ्ना उत्तराधिकारी डोनाल्ड ट्रम्पले कोरोना भाइरस महामारी नियन्त्रणका लागि गरेको प्रयास अपर्याप्त भएको भन्दै उनले यति प्रयासले कुनै हालतमा नपुग्ने बताएका हुन् ।

पूर्व राष्ट्रपति ओबामाले आउँदो नोभेम्बरमा हुने राष्ट्रपति चुनावमा जो बाइडेनको पक्षमा आफूले बिस्तारित भूमिका निर्वाह गर्न चाहेको पनि खुलाएका छन् ।

ओबामाले यसअघि नै राष्ट्रपति उम्मेदवारीमा आफ्नो समर्थन बाइडेनलाई रहेको घोषणा गरिसकेका छन् । बाइडने ओबामा कार्यकालमा उपराष्ट्रपति थिए ।

ओबामाले आफ्ना पूर्व कर्मचारीहरुलाई बाइडेनको चुनावी अभियानमा काम गर्न आग्रह गर्दै आएका छन् । डोनाल्ड ट्रम्प प्रशासनले अपनाएको रणनीतिका कारण कोरोना भाइरसको महामारी थप भयानक बनेको ओबामाको टिप्पणी छ ।