धैर्यपूर्वक बस्न आफ्ना नागरिकलाई चिनियाँ दुतावासको आग्रह

काठमाडौं – चिनियाँ नागरिकहरुलाई अनावश्यक बाहिर ननिस्किन र अन्तर्राष्ट्रिय उडानमाथि लगाइएको प्रतिबन्ध खुला नहुँदासम्म धैर्यतापूवर्क बस्न नेपालस्थित चिनियाँ दुतावासले आग्रह गरेको छ ।

नेपाल प्रहरीमाथि चिनियाँ नागरिकले गरेको हातपातको घटना पूर्णरुपमा सुल्झाइएको दाबी गर्दै काठमाडौंस्थित चिनियाँ दूतावासले यस्तो आग्रह गरेको हो ।

शुक्रबार सिंहदरबारको मुख्य गेट अगाडि प्रदर्शनमा उत्रिएका केही चिनियाँ नागरिकहरुले नेपाल प्रहरीमाथि हातपात गरेको घटनाको विषयमा प्रेस विज्ञप्ती निकालेर दूतावासले कोरोना महामारीको कठिन अवस्थामा नेपाल र चीनले एकअर्कालाई राम्रोसँग बुझ्ने र लकडाउनको कारण उत्पन्न हुने विभिन्न घटनालाई संयुक्तरुपमा समाधान गर्ने जनाएको छ ।

नेपालको कानुनको पालना गर्न र अनावश्यक रुपमा बाहिर ननिस्किन दूतावासका प्रवक्ताले भनेका छन् ।

चिनियाँ दूतावासका अनुसार यसअघि चिनियाँ दूतावासले नेपाल सरकारसँग सहकार्य गरेर ३४० जनालाई चीन फिर्ता लगेको थियो । नेपालले अन्तर्राष्ट्रिय उडान मे ३१ सम्म स्थगित गरेको र सीमित उडान क्षमताको कारण धेरै चिनियाँ नागरिकहरु अहिले पनि नेपालमा फसेका छन् ।