कोरोनाभाइरस अमेरिकामाथि अहिलेसम्म भएका सबै हमलाभन्दा ‘घातक’

बीबीसी – अमेरिकी राष्ट्रपति डोनल्ड ट्रम्पले कोरोना भाइरसको सङ्क्रमण अमेरिकामाथि अहिलेसम्म भएका हरेक खाले आक्रमणभन्दा घातक भएको बताएका छन्।

उनले यो महामारीले यस्तो स्वरूप लिनुमा चीनको भूमिका भएको आरोप पुनः लगाएका छन् । ह्वाइट हाउसमा नियमित सम्बोधनमा राष्ट्रपति ट्रम्पले कोरोना भाइरसको प्रभावलाई लिएर गम्भीर चिन्ता व्यक्त गरेका हुन्।

उनले दोस्रो विश्वयुद्धका बेला जापानी बमवर्षक विमानद्वारा पर्ल हार्बरमा गरिएको बमबारी र दुई दशकअघि न्यूयोर्कस्थित ट्विन टावरमा भएको आतङ्कवादी हमलाभन्दा पनि कोरोना भाइरसको महामारी घातक देखिएको बताए।

चीनमाथि निरन्तर हमला
उनले चीनमा रहेको भाइरसको मुहानै यो रोकिनुपर्थ्यो तर त्यसो नभएको बताएका छन् ।
कोभिड १९ सङ्कटले अमेरिका र चीनबीच तनाव बढाएको छ । ट्रम्पका भनाइमा यदि चीनले तत्काल कदम चालेको भए यसले विश्वव्यापी महामारीको रूप लिने थिएन।

बीबीसी संवाददाता बारबरा प्लेट अशरका अनुसार विदेशमन्त्री माइक पोम्पेओले पनि चीनविरुद्धको आफ्नो कठोर आलोचना दोहोर्‍याएका छन्। चीनको अपारदर्शी व्यवहारकै कारण भइरसले महामारी बन्न पुगेको उनको भनाइ छ।

उनले चीनको प्रयोगशालाबाट भाइरस फैलिएको भन्ने यथेष्ट प्रमाणहरू रहेको पनि दोहोर्‍याए। तर अमेरिकाले अहिलेसम्म कुनै प्रमाण भने प्रस्तुत गरेको छैन। चीनले उक्त आरोप अस्वीकार गर्दै आएको छ।

अमेरिकामा अहिलेसम्म ७३ हजार जनाको मृत्यु भएको छ भने १२ लाख जना सङ्क्रमित भएका छन्। अमेरिका विश्वमै सबैभन्दा धेरै कोरोनाको संक्रमण फैलिएको देश हो ।