कोरोनाको केन्द्रबिन्दु वुहानका अस्पतालहरुमा एउटा पनि कोरोनाका बिरामी नरहेकाे चीनकाे घोषणा

एजेन्सी – चीनले कोरोनाको केन्द्रबिन्दु वुहान शहरमा रहेका अस्पतालहरुमा एउटा पनि कोरोनाका बिरामी नरहेका घोषणा गरेको छ ।

गत वर्षको डिसेम्बरमा पहिलोपटक नोभल कोरोना भाइरस वुहानमा देखिएको थियो। वुहानको एक समुन्द्री खाना तथा मासु पसलबाट सुरु भएर कोरोना भाइरस चीन हुँदै संसारभर फैलिएको बताइन्छ।

तर, वुहानमा शुक्रवार संक्रमणको कुनै लक्षण नदेखिएका २० नयाँ संक्रमित फेला परेका छन् । उनीहरूसँगै त्यहाँका शंकास्पद ५ सय ३५ विरामीलाई चिकित्सकिय निगरानीमा राखिएको छ।

चीनको सबैभन्दा धेरै प्रभावित क्षेत्र वुहान शहरमा ७६ दिन लकडाउन भएको थियो । तथ्यांक अनुसार वुहानमा ५० हजार ३ सय ३३ जनालाई संक्रमण भएको र १२ सय ९० जनाको ज्यान गएको छ।

चीनभर कोरोनाबाट ज्यान गुमाउनेको संख्या ३ हजार ८ सय ६९ रहेको छ ।