अमेरिकामा बन्दुक बोकेर लकडाउन उल्लंघन गर्नेलाई राष्ट्रपति ट्रम्पको समर्थन

एजेन्सी – अमेरिकाका राष्ट्रपति डोनाल्ड ट्रम्पले लकडाउनविरुद्ध बन्दुक बोकेरै प्रदर्शन गरिरहेकाहरुको समर्थन गरेका छन् ।

मिसिगन, ओहायो, नर्थ क्यारोलाइना, मिनेसोटा, उटा, भर्जिनिया र केन्टुकीमा लकडाउनविरुद्ध भैरहेको प्रदर्शनमा उनले समर्थन जनाएका हुन् । ति राज्यहरुमा डेमोक्रेटको शासन रहेको छ ।

ट्रम्पले नै यस्तो प्रदर्शनको समर्थन गर्दा सडकमा भीड बढेको छ । कोरोना भाइरसको संक्रमण फैलिन नदिन राज्यहरुले घरमै बस्न गरिएको लकडाउनको उनीहरुले उल्लंघन गरेका हुन् ।

ट्रम्पले ट्वीटमा लकडाउन खुकुलो पार्न माग गर्दै मिनेसोटा, मिसिगन तथा भर्जिनियामा लकडाउन खुकुलो पार्न भनेका भनेका छन् ।

लकडाउनले आर्थिक गतिविधि ठप्प हुँदा नागरिक समस्यामा पारेको प्रदर्शनकारीको भनाइ छ । स्वास्थ्य अधिकारीले भने लकडाउन हटाए वा खुकुलो पारेमा संक्रमण थप फैलिने चेतावनी दिएका छन् ।

ट्रम्पले आफ्नो ट्वीटमा डेमोक्रेट राज्यको मात्र उल्लेख गरेको र प्रदर्शन नै भएको ओहायो र उटालाई भने उल्लेख नगर्नुले पनि यसलाई राजनीतिक रंग दिन खोजिएको आशंका हुँदैछ ।

विस्कनसिन, ओरिगन, मेरिल्याण्ड, आइडाहो र टेक्सासमा पनि प्रदर्शनको तयारी भैरहेको छ ।

ट्रम्प प्रशासनले लकडाउन हटाउने योजना सार्वजनिक गरेको भोलिपल्टै प्रदर्शन चर्किएको हो ।