साउदीमा थप ४ जना नेपालीमा कोरोना संक्रमण

काठमाडौं । साउदी अरबमा चार जना नेपालीमा कोरोना भाइरसको सङ्क्रमण पुष्टि भएको छ । भाइरसको सङ्क्रमणबाट बच्न थप सावधानी अपनाउन मन्त्रालयले आग्रह गरेको त्यहाँको स्वास्थ्य मन्त्रालयले जनाएको छ ।

साउदी अधिकारीहरुले सार्वजनिक गरेको तथ्याङ्क अनुसार आइतबारसम्ममा कोरोना सङ्क्रमितको सङ्ख्या दुई हजार तीन सय ८५ पुगेको छ । पछिल्लो ४८ घण्टामा तीन सय ४० भन्दा धेरैमा सङ्क्रमण देखिएको छ । राजधानी रियादमा मात्र आइतबार ६६ जनामा सङ्क्रमण देखिएको बताइएको छ ।

साउदी मन्त्रालयका अनुसार अहिलेसम्म सङ्क्रमितमध्ये चार सय ८८ जना निको भएका छन् । त्यस्तै आइतबार थप पाँच जनाको ज्यान गएसँगै ज्यान गुमाउनेको सङ्ख्या ३४ पुगेको छ ।

साउदी अरबमा कोरोना भाइरसको सङ्क्रमण हरेक दिन बढ्दो क्रममा रहेको र नेपाली नागरिकहरुमा पनि सङ्क्रमण देखिएकोले महामारीबाट बच्न सावधानी अपनाउन नेपाली राजदूतावासले अनुरोध गरेको छ ।