पूर्वमन्त्री सञ्जयकुमार साहलाई २८ करोड ५० लाख जरिवाना

काठमाडौं – विशेष अदालतले पूर्वमन्त्री सञ्जयकुमार साहलाई बिगोको दोब्बर २८ करोड ५० लाख रुपियाँ जरिवानाको फैसला गरेको छ ।

गैरकानुीरूपमा सम्पत्ति आर्जन गरी शुद्धीकरण गरेको ठहर गदैै विशेष अदालतले यस्तो फैसला गरेको हो ।
फैसला अनुसार उनलाई सम्पत्ति शुद्धीकरण गरेकोमा ५ वर्ष कैद हुने समेत ठहर गरेको छ।

विशेष अदालतका न्यायाधीश ९सदस्यहरू कृष्ण गिरी, शान्ति सिंह थापा र चन्द्रबहादुर सारुको इजलासले २८ करोड ५० लाख रुपियाँ जरिवाना गरी ५ वर्ष कैद हुने फैसला गरेको हो।

गैरकानुनी सम्पत्तिलाई शुद्धीकरण गरेको आरोप लगाई पूर्वमन्त्री साहसहितलाई प्रतिवादी बनाई सम्पत्ति शुद्धीकरण विभागले २०७४ साल चैत १६ गते विशेष अदालतमा मुद्दा दायर भएको थियो ।

विभागले साहद्वारा १४ करोड २५ लाख रुपियाँ बिगो कायम गरेको थियो। सम्पत्ति शुद्धीकरणसम्बन्धी ऐनमा बिगोको दोब्बर जरिवाना हुने प्रावधान छ।

यसअघि विशेष अदालतले पदको दुरुपयोग गरी साहले १९ करोड ४४ लाख ३८ हजार रुपियाँ भ्रष्टाचार गरेको ठहर गरेको विशेष अदालतका सूचना अधिकृत इन्द्रकुमार खड्काले बताए ।

अकूत सम्पत्ति आर्जन गरेको दाबीसहित अख्तियार दुरुपयोग अनुसन्धान आयोगले २०७३ साल पुस २५ गते मुद्दा दायर गरेको थियो।