आजबाट मौसम सफा रहने

काठमाडौं – पश्चिमी वायु बाहिरिएसँगै आज (आइतबार)देखि देशभरको मौसम सफा हुने मौसमविद्ले बताएका छन्। मौसम पूर्वानुमान महाशाखाका अनुसार हिजो शनिबार बेलुकाबाट पश्चिमी वायुको पश्चिमी न्यून चापीय प्रणाली बाहिरिएको हो। योसँगै अब वर्षा तथा हिमपात हुने सम्भावना नरहेको मौसम पूर्वानुमान महाशाखाले बताएको छ ।

अहिले प्रिमनसुन अवधि हो। यस अवधिमा स्थानीय वायुको प्रभाव हुन्छ। तर पश्चिमी वायुसमेत मिसिँदा भने बदली र वर्षा बढ्छ। यसअघि यी दुवै वायुको प्रभाव रहेकाले देशका धेरै स्थानमा राम्रै वर्षा भएको थियो ।

मौसम पूर्वानुमान महाशाखाको रेकर्डअनुसार सबैभन्दा बढी वर्षा दाङमा २७।४ मिलिमिटर वर्षा भएको छ। दोस्रोमा पोखरामा २५।८ मिलिमिटर वर्षा भएको छ भने यसपछि दिपायलमा २४।२ मिलिमिटर वर्षा भएको छ।

यसैगरी काठमाडौं उपत्यकामा ८।१ मिलिमिटर वर्षा भएको महाशाखाको तथ्यांकमा उल्लेख छ। आज काठमाडौं उपत्यकाको मौसम पनि दिनभर सफा रहने र घाम लाग्ने जनाएको छ ।