औषधी निर्यात नगर्ने भारतको घोषणा, संसारभर औषधी अभाव हुने भय

एजेन्सी – भारतले कैयौं औषधिको निर्यातमा नियन्त्रण गर्ने घोषणा गरेको छ । विश्वभरि कोरोनाभाइरसको संक्रमण फैलिरहेको बेला भारतले यस्तो घोषणा गरेको हो ।

जनेरिक औषधिको सबभन्दा ठूलो आपूर्तिकर्ता भारतले औषधि निर्माणमा प्रयोग हुने २६ प्रकारका सामग्री तथा त्यसबाट बन्ने औषधिको निर्यातमा नियन्त्रण गर्ने घोषणा गरेको छ ।

भारतको यो घोषणासँगै संसारभर औषधिको अभाव हुने भय उत्पन्न भएको छ ।

अहिलेसम्म चीनबाहेक ८० वटा देशमा कोरोनाभाइरसको संक्रमण भेटिएको छ । चीनबाट फैलिएको कोरोना भाइरस युरोप, अमेरिका र अफ्रिकामा समेत फैलिएको छ । कोरोना भाइरसका कारण ९३ हजारभन्दा बढी संक्रमित भएका छन् भने ३ हजार २ सय भन्दा धेरैको मृत्यु भइसकेको छ ।

भारतले नियन्त्रण गर्ने घोषणा गरेका औषधिमा प्यारासिटामोल पनि पर्छ । यो औषधि शरीरको दुखाइ कम गर्न विश्वभरी सबभन्दा धेरै प्रयोग गरिने औषधि हो । भारतको यो घोषणा औषधिको कच्चा पदार्थ उत्पादन गर्ने चिनियाँ कम्पनीहरू बन्द भएको वा सीमित क्षमतामा सञ्चालित भएको बेला आएको हो ।

भारतका औषधि निर्माताहरू ७० प्रतिशत कच्चा पदार्थका निम्ति चीनमा निर्भर छन् । औषधि उद्योगका विज्ञहरूले प्रकोप जारी रहे तिनले अभाव झेल्नुपर्ने चेतावनी दिइसकेका थिए । ‘चीनमा नबन्ने औषधिका कच्चा पदार्थ पनि चीनबाटै मगाइन्छ । यदि भारत र चीन दुवै प्रभावित भए भने विश्वभरी नै अभाव हुनसक्छ,’ चाइना मार्केट रिसर्च ग्रुपका विश्लेषक शउन रेन भन्छन् ।

एफडीएका आयुक्त स्टीभन हानले भारतको पछिल्लो निर्णयले अमेरिकामा औषधि आपूर्तिमा कति असर पार्छ भनेर निक्र्योल गर्ने प्रयास भइरहेको बताए ।

अमेरिकाका ठूला औषधि निर्माता कम्पनीहरूले उनीहरूले आपूर्ति प्रणालीको निगरानी गरिरहेको बताएका छन् ।
गत साता माइलन कम्पनीले औषधिको अभाव हुने चेतावनी दिएको थियो ।