कोरोनाले मृतकको संख्या २६ सय पुर्यायो, डब्लुएचओले दियो अर्को चेतावनी

एजेन्सी – विश्व स्वास्थ्य संगठनले कोरोनाको सम्भावित महामारी रोक्न थप प्रभावकारी कदम चाल्नुपर्ने बताएको छ । अहिलेसम्म मृतकको संख्या २६ सय पुगिसकेको भन्दै यसलाई थप विकराल रुप नदिन थप कदम चाल्नुपर्ने डब्लुएचओले जनाएको छ ।

चीनको हुबेइ प्रान्तबाट गत डिसेम्बरमा सुरु भएको कोरोना भाइरसका कारण चीनसहित विभिन्न मुलुकमा मृत्यु हुनेको संख्या दुई हजार ६ सय पुगिसकेको छ ।

चीनमा मात्र ७७ हजार भन्दा बढी प्रभावित भएका छन् ।

पछिल्लो समय दक्षिण कोरिया, इटाली, इरानलगायतका देशमा पनि तीव्र रुपमा फैलिन थालेको कोरोनाका कारण मृत्यु हुनेको संख्या बढ्दै गएको छ ।

इटालीमा मात्र कोरोनाका कारण मृत्यु हुनेको संख्या ७ पुगेको छ ।

यसैबीच चीनले कोरोना भाइरसका संक्रमण नियन्त्रणका प्रयास जारी राख्न अर्को महिना बस्ने भनिएको कम्युनिष्ट पार्टीको वार्षिक बैठक स्थगित गरेको छ ।

कोरोनाका कारण विश्वव्यापी सेयर बजारमा पनि गिरावट आएको छ ।