भारतमा हिंसा भड्कियो, १ प्रहरीसहित ४ जनाको मृत्यु

एजेन्सी– भारतमा विवादास्पद नागरिकता विधेयकको विरोधमा भएको हिंसाका क्रममा चार जनाको मृत्यु भएको छ ।

दिल्लीको यमुनापार क्षेत्रमा सोमबार भएको हिंसामा उनीहरुको मृत्यु भएको बीबीसीले जनाएको छ ।

२५ जनाभन्दा धेरै घाइतेलाई उपचारका लागि अस्पतालमा भर्ना गरिएको छ । ठाउँठाउँमा प्रहरी र प्रदर्शनकारीबीच झडप भएका छन् ।

बढिरहेको हिंसालाई नियन्त्रण गर्न प्रशासनले उत्तर पूर्वी दिल्लीका १० इलाकामा कर्फ्यु लगाएको छ । दिल्लीका मुख्यमन्त्री अरविन्द केजरीवालले प्रदर्शनकारीलाई संयमता अपनाउन आह्वान गरेका छन् ।

हिंसा फैलिएको क्षेत्र मुस्लिम समुदायको बाक्लो बस्ती रहेको क्षेत्र हो । भारतले ल्याएको नागरिकतासम्बन्धी नयाँ कानुनले मुस्लिम समुदायक बाहेकका आप्रवासीलाई धार्मिक आधारमा नागरिकता दिन सकिने व्यवस्था गरेको छ ।