चीनमा कोरोनाको संत्रास,नाइजेरियामा ‘लासा’ ज्वरोबाट ७० को मृत्यु

एएफपी-नाइजेरियामा ‘लासा’ नाम दिइएको ज्वरोबाट मृत्यु हुने व्यक्तिको सङ्ख्या कम्तीमा पनि ७० पुगेको त्यहाँका स्वास्थ्य अधिकारीहरुले जानकारी दिएका छन्।

स्वास्थ्य अधिकारीका अनुसार नाइजेरियाको रोग नियन्त्रण केन्द्रले यो ज्वरोबाट ज्यान जानेको सङ्ख्या थप बढ्न सक्ने जनाएको छ। नाइजेरियामा उक्त ज्वरोको प्रकोप प्रतिदिन बढ्दो मात्रामा रहेको पनि बताइएको छ।

यस ज्वरोबाट सङ्क्रमित भएर अस्पताल भर्ना भएका व्यक्तिको सङ्ख्या ४७२ जना रहेको छ। अफ्रिकन देश नाइजेरियामा जनघनत्व बढी भएकोले गर्दा ‘लासा’ ज्वरोले धेरै नागरिक प्रभावित भएको पाइएको समाचारमा जनाइएको छ।

यस ज्वरोबाट देशका ३६ मध्येका कम्तीमा पनि २३ वटा प्रान्तका नागरिक प्रभावित भएको पाइएको अधिकारीलेहरुले जानकारी दिएका छन्। देशको दक्षिण भागमा पर्ने इबोन्यी, इदो र ओदो प्रान्तका व्यक्तिहरु यस ज्वरोबाट बढी प्रभावित भएका जनाइएको छ।