आईजीपी खनालले मंगलबारदेखि अवकाश पाउँदै, को हुँदै छन् नयाँ आईजीपी ?

काठमाण्डौ – प्रहरी महानिरीक्षक (आईजीपी) सर्वेन्द्र खनालले मंगलबारदेखि अवकाश पाउने भएका छन् ।
महानिरीक्षक खनालसँगै १८ डीआईजी र तीन एआईजीले पनि अवकाश पाउँदै छन् ।
३० वर्षे सेवा अवधिका कारण उनले अनिवार्य अवकाश पाउन लागेका हुन् । खनालले अवकाश पाउने भएपनि नयाँ आईजीपीबारे भने अझै टुंगो लागेको छैन ।
बहालवाला आईजीपी अवकाश पाउनुअघि नै बिदामा बसेर भावी आईजीपीलाई जिम्मेवारी हस्तान्तरण गर्ने चलन भए पनि नयाँको टुंगो नलाग्दा यो सम्भव हुन सकेन ।

खनाल २०७४ सालको फागुन २८ मा नेपाल प्रहरीको २६ औं प्रहरी महानिरीक्षक बनेका थिए ।

खनालपछि महानिरीक्षकमा तीन प्रहरी नायव महानिरीक्षक डीआईजीहरु दाबेदारका रुपमा रहेका छन् ।

प्रदेश १ का ठाकुर ज्ञवाली, सुदूरपश्चिम प्रदेशका तारिणीप्रसाद लम्साल र प्रहरी प्रधान कार्यालयका सूर्यप्रसाद उपाध्याय दाबेदार रहेका हुन् ।
ज्ञवाली र लम्सालको नाम मुख्य चर्चामा छ ।