हुुवेईमा रहेका नेपालीलाई नेपाल ल्याउन केही दिन अझै लाग्ने, अभिभावकको छटपटी

काठमाडौं – चीनको हुबे प्रान्तमा रहेका नेपालीहहरूलाई फिर्ता ल्याउन अझै केही दिन लाग्ने भएको छ ।

बुधवारसम्म उनीहरुलाई राख्ने व्यवस्था मिलाइ सक्ने र त्यस लगतै मध्य चीनको वुहान र वरपरका नगरमा रहेका नेपालीहरूलाई नेपाल ल्याइने सरकारी अधिकारीहरुले बताएका छन् ।

राष्ट्रिय मानव अधिकार आयोगले चीनको हुबेमा रहेका नेपालीहरुलाई तत्काल फर्काउन सरकारलाई निर्देशन दिईसकेको छ । चीन स्थित नेपाली दूतावासका अधिकारीले आफूहरू अझै नेपाल सरकारको निर्णयको पर्खाइमा रहेको बताएका छन्।

चार दिनअघि प्रधानमन्त्री केपी ओलीले कोरोनाभाइरसको सङ्क्रमण सुरु भएको चीनको हुबे प्रान्तको वुहान नगर र वरपर रहेका नेपालीहरूलाई फर्काउने व्यवस्था मिलाउन निर्देशन दिएका थिए। तर, त्यसो हुन भने सकेको छैन ।

चीनमा रहेकाहरुको परिवारका सदस्यहरु सरकारका विभिन्न निकायमा पुगेर हारगुहार गरिरहेका छन् ।
हुबे प्रान्तमा रहेका नेपालीहरूलाई फर्काउने विषयमा लगातार सरकारका उच्च अधिकारीहरूबीच बैठक भइरहेका छन्। तर उनीहरूलाई ल्याएर छुट्टै स्थानमा राख्नुपर्ने र त्यसको व्यवस्थापनको काम भइरहेको अधिकारीहरू बताउँछन्।

हुबेमा १८६ जनाको संख्या रहेका नेपालीलाई चिकित्सकीय निगरानीमा अलग्गै राख्नका लागि भइरहेका काम बुधवार सम्ममा सकिने सरकारले जनाएको छ ।