सुकुटी र आलो मासुको लोभले दुई नेपालीको जापान जाने भिषा रद्ध

काठमाण्डौ-जापानले प्रतिबन्धित बस्तुको सूचिमा राखेको आलो मासु र सुकुटी लिएरै बिमानस्थलमा पुगेका दुइ नेपालीको भिषा रद्द गरिदिएको छ।

३ वर्षको भिसामा सुकुटी र आलो मासु बोकेर जापानको विमानस्थलमा ओर्लिएका बाबुछोरा जापानले विमानस्थलमार्फत आफ्नो देशमा ल्याउन प्रतिबन्ध लगाएका वस्तु ल्याएको भन्दै उनीहरुको भिसा रद्द गरेको जनाइएको छ। उनीहरुलाई जनवरी २६ मा विमानस्थल अध्यागमनले नियन्त्रणमा लिएको बताइएको छ।

उनीहरु ड्रागन एयरको विमानबाट नारिता बिमानस्थलमा ओर्लिएपछि चेकजाँचको काम पनि सकेर विमानस्थलबाट बाहिरिएका थिए। तर रेल चढ्नै लाग्दा बाबुछोरालाई विमानस्थलको बाहिरी भागमा रहेका अधिकारीले सोधपुछ गरे। उनीहरुको लगेज खोलेर चेक गर्दा करिब ३ किलो सुकुटी र ३ किलो आलो मासु भेटिएको थियो।

जापान पुगिसकेका उनिहरुको ३ बर्षे भिषा नै रद्द भएपछि स्वदेश फर्किएका छन। चितवनमा बसोबास गर्दै आएका भट्टराई थरका उनिहरु बाबु छोरा हुन। उनिहरुको अन्य विवरण खुलाइएको छैन ।

उनीहरुले सुटकेसमा करिब ३ किलो सुकुटी र ३ किलो आलो मासु, हरियो तथा धुलो खुर्सानी लगायतका खानेकुरा लगेका थिए।