अग्नी सापकोटा सभामुखमा निर्विरोध चयन

काठमाडौं-अग्नी सापकोटा प्रतिनिधिसभाको सभामुख पदमा निर्विरोध चयन भएका छन् । सभामुख पदका लागि सापकोटाको एकल उमेदवारी परेको थियो |

प्रतिनिधिसभाले नयाँ सभामुख पाएको छ । आज बसेको प्रतिनिधिसभा बैठकले नेकपाका एक्ला उमेदवार अग्नी प्रसाद सापकोटालाई सभामुख पदमा सर्वसम्मत चयन गरेको हो ।

सापकोटालाई सभामुख बनाउन नेकपाका सांसद सुवासचन्द्र नेम्वाङले प्रस्ताव गर्नुभएको थियो । उनको समर्थनमा नेकपा सांसद देव गुरुङ र ओनसरी घर्ती तथा राजपाका लक्ष्मणलाल कर्ण रहनुभएको थियो ।

यौन दुब्र्यवहारको अभियोगमा तत्कालिन सभामुख कृष्णबहादुर महरा पक्राउ परेपछि सत्तारुढ नेकपाले उम्मेद्वार चयन गर्न नसक्दा लामो समय हिउँदे अधिवेशन शुरु भएको झण्डै डेढ महिनासम्म पनि प्रतिनिधिसभाले सभामुख पाउन सकेको थिएन ।

प्रतिनिधिसभाको हिउदे अधिवेशनको पहिलो बैठक पुस ४ गते बसेको भएपनि संसदले ३८ दिनपछि मात्रै आईतबार सभामुख पाएको हो । कृष्णबहादुर महराले असोज १४ गते राजीनामा दिएपछि प्रतिनिधिसभाको सभामुख पद रिक्त थियो ।

प्रतिनिधिसभाको अर्को बैठक माघ १४ गते मंगलबार अपरान्ह १ बजेका लागि बोलाईएको छ ।