सभामुखका लागि अग्नी सापकोटाको एकल उम्मेदवारी

काठमाडौं-सत्तारुढ दल नेपाल कम्युनिष्ट पार्टी (नेकपा) का तर्फबाट अग्नी प्रसाद सापकोटाले सभामुखका लागि उम्मेदवारी दर्ता गराएका छन् ।

मंगलबार सापकोटाले सभामुखका लागि आफ्नो उम्मेदवारी दर्ता गराएका हुन । सुवास नेम्वाङको प्रस्तावक तथा देव गुरुङ, ओनसरी घर्ती र लक्ष्मणलाल कर्णको समर्थनमा उनले उम्मेदवारी दर्ता गराएका हुन् ।

उम्मेदवारी दर्तापछि सापकोटाले जननिर्वाचित सर्वोच्च संस्थाको गरिमा र यसको मूल्य मान्यतालाई अझ उचो पार्न भगिरथ प्रयास गर्ने प्रतिक्रिया दिएका छन् ।
माघ १२ हुने सभामुखको निर्वाचनका लागि सापकोटाको एकल उम्मेदवारी परेको छ । प्रतिपक्षी दल नेपाली कांग्रेसको संसदीय दलको बैठकले सभामुखमा उम्मेदवारी नदिने घोषणा गरिसकेको छ ।