उखुको भुक्तानी गर्ने म्याद आज सकिदै, किसानले बक्यौता रकम अझै पाएनन्

काठमाडौं – सरकारले उखु किसानलाई बक्यौता रकम भुक्तानी गर्न चिनी उद्योगलाई दिएको समयसीमा आज सकिने भएको भएपनि किसानले बक्यौता रकम भने अझै पाएका छैनन् ।

गएको पुस १८ गते माघ ७ गतेसम्म चिनी उद्योग र सरकारबीच उखु किसानको बक्यौता रकम उपलब्ध गराउनेसहित पाँच बुँदे सहमति भएको थियो ।

चिनी उद्योगले उखु किसानलाई ५९ करोड १६ लाख ५४ हजार ७५२ रुपैयाँ भुक्तानी दिनुपर्ने उद्योग विभागले जनाएाको छ । गत आइतबारसम्ममा विभागले संकलन गरेको तथ्यांकअनुसार १४ वटा चिनी उद्योगमध्ये सातवटा उद्योगले मात्र उखु किसानको बाँकी बक्यौता रकम भुक्तानी गरेका छन् ।

बाँकी सातवटा उद्योगले सरकार र किसानसँग भएको सहमतिपछि केही बक्यौता रकम भुक्तानी गरे पनि पूरै भुक्तानि गर्न सकेका छैनन् ।

नवलपरासीको लुम्बिनी सुगर मिलका सञ्चालक अहिलेसम्म सम्पर्कमा नआएका उद्योग विभागका प्रवक्ता विनोद खड्काले बताए ।

बक्यौता रकम भुक्तानीको माग गर्दै आन्दोलित भएका उखु किसानले सरकार र चिनी उद्योगबीच पाँच बुँदे सहमति भएपछि आन्दोलनका कार्यक्रम स्थगित गरेका थिए ।