सेनाका पछाडी सेनाकै गुप्तचर !

,काठमाडौं – नेपाली सेनामा अहिले शैक्षिक प्रमाणपत्रको छानविन कार्यलाई प्राथमिकतापूर्वक अघि बढाएको समाचार छ । २०–२५ वर्षदेखि नेपाल सेनामा कार्यरत अधिकृत दर्जादेखि जवानसम्मका सैनिकहरुको शैक्षिक प्रमाणपत्रलाई छानविनको दायरामा ल्याइएपछि सेनामा एक खालको तरंग सिर्जना भएको छ ।

यति लामो अवधिमा सेनामा जागिर खाइसकेपछि अहिले एकाएक छानविनका थालनी भएपछि सेवा छनोटकै बेला गरिनुपर्ने छानविनको कार्य किन अहिले गरिदैछ भन्ने प्रश्न पनि यससँगै उठेको छ ।

साँघु साप्ताहिकले लेखेको खबर अनुसार,माओवादी सेनाबाट समायोजनका क्रममा नेपाली सेनामा प्रवेश गरेका लडाकुहरुको शैक्षिक योग्यता क कस्तो अवस्थामा छ भन्ने चर्चा पनि यससँगै चुलिएको बताईन्छ ।

बढुवाका प्रक्रियामा एउटालाई एकथरी र अर्कोलाई अर्कोथरी मापदण्ड समेत किन अपनाईदै छ भन्ने प्रश्न समेत सिर्जना भएको छ ।
सेवा प्रवेशका क्रममा सुरुमा नै गर्नुपर्ने प्रक्रिया अहिले सुरु गर्दा एकखालको आशंका र अविश्वासको वातावरण सिर्जना भएको नेपाली सेना स्रोतको भनाई छ ।

नेपाली सेनाको महत्वपूर्ण मानिने सैनिक गुप्तचर विभागले आतंककारीको गतिविधि निगरानी, राष्ट्रघाती तथा देशद्रोही कार्यको सुचना संकलन, सीमा सुरक्षा र अपराध आदिको अनुगमन गर्नुपर्नेमा सैन्य स्रोत र साधनलाई आफ्नै अधिकृत तथा जवानको पछाडी किन जासुसी गर्न व्यस्त बनाईएको भन्ने चासो र कौतुहल समेत पैदा भएको छ, यतिबेला नेपाली सेनामा ।

सैनिक स्रोतका अनुसार, अहिले मुलुकमा नेत्र विक्रम चन्द नेतृत्वको विद्रोही नेकपाका शसस्त्र गतिविधि, अन्य सुरक्षाका विषयमा अनुसन्धान, निगरानी गर्ने कार्यलाई प्राथमिकतामा पार्नुको साटो आफ्नै संगठनका अधिकृतहरुका पछाडि जासुसी गर्न, निजी र आन्तरिक मामिलामा प्रवेश गर्ने कार्यलाई कतिपयले नेपाली सेनामा असन्तुष्टी समेत प्रकट गरेको पाईन्छ ।